ທ່ານສີຈິ້ນຜິງ ປະທານປະເທດຈີນໄດ້ພົບປະນັກຂ່າວຈີນແລະຕ່າງປະເທດຢູ່ສູນປະຊຸມສາກົນເຊ້ຍເໝິນໃນວັນທີ 5 ກັນຍານີ້ ໂດຍໄດ້ແຈ້ງບັນຍາກາດກອງປະຊຸມສຸດຍອດຜູ້ນຳປະເທດບຣິກສ໌ຄັ້ງທີ 9 ແລະກອງປະຊຸມຫາລືລະຫວ່າງປະເທດຕະຫຼາດຈະເລີນໃໝ່ກັບປະເທດພວມພັດທະນາ.
ທ່ານສີຈິ້ນຜິງຊີ້ອອກວ່າ, ກອງປະຊຸມສຸດຍອດເຊ້ຍເໝິນຂອງປະເທດບຣິກສ໌ໄດ້ຜ່ານ "ຖະແຫຼງການເຊ້ຍເໝິນຜູ້ນຳປະເທດບຣິກສ໌" ໂດຍເນັ້ນຈິດໃຈບຣິກສ໌ໃນການເປີດປະຕູ, ກວມລວມ, ຮ່ວມມື ແລະຕ່າງຝ່າຍຕ່າງມີຜົນປະໂຫຍດ. ນອກນີ້ຍັງໄດ້ສະຫຼຸບບົດຮຽນແຫ່ງຜົນສຳເລັດໃນການຮ່ວມມືລະຫວ່າງປະເທດບຣິກສ໌ໃນຮອບ 10 ປີ ແລະວາງແຜນໃໝ່ເພື່ອຮັດແໜ້ນສາຍພົວພັນລະຫວ່າງປະເທດບຣິກສ໌ ແລະລົງເລິກການຮ່ວມມືຕົວຈິງໃນທຸກຂົງເຂດ. ປະມຸກລັດທັງ 5 ປະເທດເຫັນວ່າ, ປະເທດບຣິກສ໌ຄວນລົງເລິກການແລກປ່ຽນແລະປະສານງານໃນບັນຫາທີ່ສຳຄັນ, ປົກປ້ອງຫຼັກການພື້ນຖານແຫ່ງການພົວພັນລະຫວ່າງຊາດ, ຮ່ວມມືກັນເພື່ອຮັບມືກັບສິ່ງທ້າທາຍທີ່ເປັນບັນຫາຂອງທົ່ວໂລກ ແລະເລັ່ງປະຕິຮູບການຄຸ້ມຄອງເສດຖະກິດທົ່ວໂລກ; ລົງເລິກການຮ່ວມມືດ້ານການເມືອງແລະຄວາມໝັ້ນຄົງ, ສ້າງຄວາມເຂົ້າໃຈກັນແລະຍົກນ້ຳໃຈມິດຕະພາບຂອງປະຊາຊົນທັງ 5 ປະເທດ; ປະມຸກລັດ 5 ປະເທດຕັດສິນໃຈຖືເອົາກອງປະຊຸມເຊ້ຍເໝິນເປັນຈຸດເລີ່ມໃໝ່ ເພື່ອຮ່ວມກັນເປີດ "ທົດສະວັດສີຄຳ" ຮອບທີ 2 ແຫ່ງການຮ່ວມມືລະຫວ່າງປະເທດບຣິກສ໌.
ທ່ານສີຈິ້ນຜິງຊີ້ອອກວ່າ, ປີໜ້າ, ອາຟຣິກາໃຕ້ຈະເປັນປະເທດປະທານປະເທດບຣິກສ໌ ແລະຈະຈັດກອງປະຊຸມສຸດຍອດຄັ້ງທີ 10 ຢູ່ຈອນເນສບວກ ເຊິ່ງຈີນຍິນດີຮ່ວມກັບບັນດາຝ່າຍອອກແຮງສະໜັບສະໜູນຢ່າງສຸດຂີດ ແລະຈັບມືກັນຊຸກຍູ້ການຮ່ວມມືລະຫວ່າງປະເທດບຣິກສ໌ໃຫ້ສືບຕໍ່ຂະຫຍາຍຕົວຢ່າງຕໍ່ເນື່ອງ.
 |
