ທ່ານອາເລັກຊັນເດີ ລາຟເວນຕີເອຟ ທູດພິເສດປະທານາທິຣັດເຊຍໄດ້ເດີນທາງເຖິງນະຄອນຫຼວງເຕເຮຣານປະເທດອີຣານໃນວັນທີ 5 ກັນຍານີ້ ເພື່ອປຶກສາຫາລືບັນຫາຊີຣີກັບທ່ານອາລີ ຊຳຄານີ ເລຂາທິການຄະນະກຳມະການຄວາມໝັ້ນຄົງແຫ່ງຊາດຂອງປະເທດດັ່ງກ່າວ.
ທ່ານອາເລັກຊັນເດີ ລາຟເວນຕີເອຟ ໄດ້ແຈ້ງໃຫ້ຮູ້ເຖິງຄວາມພະຍາຍາມທາງການທູດຂອງຣັດເຊຍໃນໄລຍະມໍ່ໆມານີ້ ແລະຜົນການຫາລືລະຫວ່າງຣັດເຊຍກັບປະເທດອື່ນໆກ່ຽວກັບບັນຫາຊີຣີ ໂດຍເນັ້ນວ່າ ຣັດເຊຍ, ອີຣານ ແລະຊີຣີໄດ້ເສີມຂະຫຍາຍບົດບາດຕົ້ນຕໍໃນການຕໍ່ຕ້ານລັດທິກໍ່ການຮ້າຍ. ຂະນະທີ່ທ່ານຊຳຄານີກໍກ່າວວ່າ, ອີຣານ, ຣັດເຊຍແລະຊີຣີໄດ້ສ້າງເປັນ "ຄ້າຍຕໍ່ຕ້ານລັດທິກໍ່ການຮ້າຍທີ່ແທ້ຈິງ" ແລະພວມປະສົບຜົນສຳເລັດໃນດ້ານນີ້.
ທ່ານຊຳຄານີກ່າວຕື່ມວ່າ, ອະທິປະໄຕຂອງຊີຣີຕ້ອງໄດ້ຮັບການເຄົາລົບ ແລະບັນດາຝ່າຍທີ່ກ່ຽວຂ້ອງຄວນຮັບປະກັນການເຈລະຈາກັນຢູ່ພາຍໃນຊີຣີ ເພື່ອໃຫ້ປະຊາຊົນຊີຣີຕັດສິນອະນາຄົດແລະຊະຕາກຳຂອງຕົນ.