ວັນທີ 4 ກັນຍານີ້ ຢູ່ເມືອງເຊ້ຍເໝິນປະເທດຈີນ, ທ່ານສີຈິ້ນຜິງ ປະທານປະເທດຈີນໄດ້ພົບປະກັບທ່ານປຣະຍຸດ ຈັນໂອຊາ ນາຍົກລັດຖະມົນຕີໄທທີ່ເດີນທາງມາເຂົ້າຮ່ວມກອງປະຊຸມຫາລືລະຫວ່າງປະເທດຕະຫຼາດຈະເລີນໃໝ່ກັບປະເທດພວມພັດທະນາ ແລະໄດ້ຮ່ວມເປັນສັກຂີພິຍານໃຫ້ແກ່ການລົງນາມໃນເອກະສານ 4 ສະບັບ ໃນນີ້ມີໂຄງການກໍ່ສ້າງທາງລົດໄຟຈີນ-ໄທ ເຊິ່ງການພົບປະດັ່ງກ່າວເປັນທີ່ສົນໃຈຂອງສື່ມວນຊົນໄທ ເຊັ່ນ: ໜັງສືພິມມະຕິຊົນ, ໜັງສືພິມໄທຣັດ, ສະຖານີໂທລະພາບໄທ ເປັນຕົ້ນລ້ວນແຕ່ໄດ້ລາຍງານຂ່າວນີ້.
ສື່ມວນຊົນໄດ້ລາຍງານວ່າ, ໃນການພົບປະ, ທ່ານປຣະຍຸດໄດ້ເນັ້ນເຖິງຄວາມມຸ່ງຫວັງຂອງລັດຖະບານໄທທີ່ຈະເພີ່ມທະວີສາຍພົວພັນຄູ່ຮ່ວມມືຍຸດທະສາດຮອບດ້ານກັບຈີນ ແລະຫວັງໃຫ້ສອງຝ່າຍຊຸກຍູ້ຄວາມຄືບໜ້າຂອງໂຄງການຮ່ວມມື, ເປີດກວ້າງການຮ່ວມມືໃນທຸກຂົງເຂດ ແລະເພີ່ມທະວີການໄປມາຫາສູ່ລະຫວ່າງປະຊາຊົນ.
ນອກນີ້, ສື່ມວນຊົນຍັງລາຍງານວ່າ, ໄທເປັນປະເທດສະມາຊິກອາຊຽນພຽງໜຶ່ງດຽວທີ່ໄດ້ຮັບເຊີນເຂົ້າຮ່ວມກອງປະຊຸມດັ່ງກ່າວ ເຊິ່ງເປັນການສ່ອງແສງໃຫ້ເຫັນວ່າ ຈີນແລະປະເທດກຸ່ມບຣິກສ໌ໝັ້ນໃຈຕໍ່ການພັດທະນາຂອງໄທຢ່າງເຕັມປ່ຽມ.