ກະຊວງການຕ່າງປະເທດອາເມລິກາປະກາດໃນວັນທີ 5 ກັນຍານີ້ວ່າ, ເພື່ອຮັບມືກັບການຂົ່ມຂູ່ຈາກ ສປປ ເກົາຫຼີ, ປະເທດຕົນແລະສ.ເກົາຫຼີ ຈະຈັດ "ກອງປະຊຸມຫາລືຍຸດທະສາດແກ່ຍາວການນາບຂູ່" ໃນທຸກໆປີ.
ລັດຖະບານສອງປະເທດດັ່ງກ່າວ ໄດ້ອອກຖະແຫຼງການກ່ຽວກັບເລື່ອງນີ້ໃນວັນທີ 5 ກັນຍານີ້ວ່າ, ອີງຕາມການຕົກລົງຂອງທ່ານ ໂດນັນ ທຣຳ ປະທານາທິບໍດີອາເມລິກາ ແລະທ່ານ ມູນເຈອິນ ປະທານາທິບໍດີສ.ເກົາຫຼີ ກ່ຽວກັບການເຮັດໃຫ້ "ກອງປະຊຸມຫາລືຍຸດທະສາດແກ່ຍາວການນາບຂູ່" ໃຫ້ເປັນປົກກະຕິ, ພາກສ່ວນການຕ່າງປະເທດແລະປ້ອງກັນປະເທດຂອງສອງປະເທດ ໄດ້ອະນຸມັດຂອບໃໝ່ໃນກົນໄກກອງປະຊຸມດັ່ງກ່າວ. ແນວໃດກໍດີ, ລັດຖະບານສອງປະເທດຈະປຶກສາຫາລືແລະປະສານງານຢ່າງໃກ້ຊິດກວ່າເກົ່າ ເພື່ອເພີ່ມທະວີຄວາມເປັນພັນທະມິດຂອງສອງປະເທດແລະຄຳສັນຍາຂອງອາເມລິກາທີ່ຈະແກ່ຍາວການນາບຂູ່.
ຄຳວ່າການ "ແກ່ຍາວການນາບຂູ່" ກໍໝາຍເຖິງອາເມລິກາຈະປົກປ້ອງດ້ານນິວເຄລຍໃຫ້ແກ່ປະເທດພັນທະມິດໃນເວລາຖືກຂົ່ມຂູ່ຫຼືຖືກໂຈມຕີຈາກນິວເຄລຍ. ໃນເວລາໄຂກອງປະຊຸມລັດຖະມົນຕີການຕ່າງປະເທດແລະປ້ອງກັນປະເທດຂອງສອງປະເທດ ຄື 2+2 ໃນເດືອນຕຸລາປີຜ່ານມາ ກໍໄດ້ຕົກລົງສ້າງຕັ້ງກົນໄກ "ກອງປະຊຸມຫາລືຍຸດທະສາດແກ່ຍາວການນາບຂູ່" ເພື່ອຫາລືວຽກງານລະອຽດທີ່ອາເມລິກາຈະປົກປ້ອງດ້ານນິວເຄລຍໃຫ້ແກ່ສ.ເກົາຫຼີ.
 |
