ກອງປະຊຸມພາຄີສົນທິສັນຍາແກ້ໄຂບັນຫາການຫັນເປັນທະເລຊາຍຂອງສະຫະປະຊາຊາດ ຄັ້ງທີ 13 ໄດ້ຈັດຂຶ້ນຢູ່ເມືອງເອີໂດສ ເຂດປົກຄອງຕົນເອງມົງໂກໃນຈີນ ໃນວັນທີ 6 ກັນຍານີ້ ໂດຍຜູ້ແທນ 2.000 ກວ່າທ່ານຂອງ 196 ພາຄີ ແລະ 20 ກວ່າອົງການຈັດຕັ້ງສາກົນເຂົ້າຮ່ວມ.
ກອງປະຊຸມດັ່ງກ່າວເນັ້ນຫົວຂໍ້ "ຮ່ວມມືກັນປ້ອງກັນແລະແກ້ໄຂບັນຫາທະເລຊາຍ, ຮ່ວມກັນສ້າງຄວາມຜາສຸກໃຫ້ແກ່ມວນມະນຸດ" ໂດຍໜ້າທີ່ຕົ້ນຕໍກໍຄື ຈັດຕັ້ງປະຕິບັດວາລະການພັດທະນາແບບຍືນຍົງ, ສ້າງຂອບຍຸດທະສາດໃໝ່ຂອງສົນທິສັນຍາ, ຮັບປະກັນບັນລຸເປົ້າໝາຍຄືບໍ່ມີດິນເປັນທະເລຊາຍເພີ່ມໃໝ່ ແລະ ລະດົມທຶນສະໜັບສະໜູນ.
ໃນອາທິດທຳອິດຂອງກອງປະຊຸມດັ່ງກ່າວ, ຈະຈັດກິດຈະກຳເຕັກນິກ, ສ່ວນອາທິດທີສອງຈະຈັດກິດຈະກຳຕົ້ນຕໍ ນອກນີ້ຍັງມີການໄປທັດສະນະສຶກສາຢູ່ພາກສະໜາມກ່ຽວກັບການປ້ອງກັນແລະແກ້ໄຂບັນຫາການຫັນເປັນທະເລຊາຍ, ຮ່ວມປູກຕົ້ນໄມ້ທີ່ລະນຶກ ແລະ ພິທີເລີ່ມຕົ້ນກົນໄກຮ່ວມມືເພື່ອປ້ອງກັນແລະແກ້ໄຂບັນຫາການຫັນເປັນທະເລຊາຍ "ໜຶ່ງແລວທາງໜຶ່ງເສັ້ນທາງ" ຕື່ມອີກ.
