ຕອນເຊົ້າວັນທີ 7 ກັນຍານີ້, ອາເມລິກາ ແລະ ສ.ເກົາຫຼີ ໄດ້ສົ່ງລົດຍິງຂີປະນາວຸດ 4 ຄັນ ພ້ອມດ້ວຍອຸປະກອນທີ່ກ່ຽວຂ້ອງຂອງລະບົບຕ້ານຂີປະນາວຸດ "ທັດ" ຊຸດສຸດທ້າຍ ເຂົ້າໄປໃນຖານທັບ "ທັດ" ກອງທັບອາເມລິກາຢູ່ເມືອງຊິງໂຈ ແຂວງຊິງຊາງບຸກ ສ.ເກົາຫຼີ.
ນັບແຕ່ກາງຄືນວັນທີ 6 ກັນຍານີ້ເປັນຕົ້ນມາ, ປະຊາຊົນທ້ອງຖິ່ນ ແລະ ຜູ້ທີ່ຮັກຫອມສັນຕິພາບ ໄດ້ເຕົ້າໂຮມກັນຢູ່ບ່ອນໃກ້ຖານທັບທີ່ຕິດຕັ້ງລະບົບ "ທັດ" ເພື່ອສະກັດກັ້ນບໍ່ໃຫ້ສົ່ງລະບົບ "ທັດ" ເຂົ້າໄປ. ຂະນະທີ່ເຈົ້າໜ້າທີ່ຕຳຫຼວດ ສ.ເກົາຫຼີ ໄດ້ສົ່ງຕຳຫຼວດປະມານ 8.000 ຄົນໄປຂັບໄລ່ກຸ່ມຄົນນັ້ນ ທັງເກີດຊຸກດັນກັນກັບປະຊາຊົນ ສົ່ງຜົນເຮັດໃຫ້ສອງຝ່າຍໄດ້ຮັບບາດເຈັບ.
ໂຄສົກກະຊວງການຕ່າງປະເທດຈີນ ກ່າວໃນວັນທີ 6 ກັນຍານີ້ວ່າ: ການຕິດຕັ້ງລະບົບຕ້ານຂີປະນາວຸດ "ທັດ" ຢູ່ ສ.ເກົາຫຼີ ບໍ່ພຽງແຕ່ບໍ່ສາມາດແກ້ໄຂບັນຫາຄວາມໝັ້ນຄົງທີ່ເປັນເລື່ອງສົນໃຈຂອງປະເທດທີ່ກ່ຽວຂ້ອງເທົ່ານັ້ນ, ຫາກຍັງຈະທຳລາຍຍຸດທະສາດທີ່ກ້ຳເກິ່ງກັນຢູ່ພາກພື້ນຢ່າງໜັກໜ່ວງ ແລະທຳລາຍຜົນປະໂຫຍດທາງຄວາມໝັ້ນຄົງດ້ານຍຸດທະສາດຂອງປະເທດໃນພາກພື້ນ ລວມທັງຈີນອີກດ້ວຍ ແລະຂະນະດຽວກັນ ກໍຈະສົ່ງຜົນເຮັດໃຫ້ສະຖານະການຢູ່ແຫຼມເກົາຫຼີເຄັ່ງຕຶງຂຶ້ນຕື່ມ ແລະ ເກີດການເປັນປໍລະປັກກັນຮຸນແຮງຍິ່ງຂຶ້ນ.
