ຈາກກໍລະນີທີ່ບັງກາລາເດັດປະທ້ວງຫຼັງເຮືອບິນທະຫານມຽນມາບິນຜ່ານນ່ານຟ້າປະເທດຕົນຫວ່າງມໍ່ໆນີ້, ເຈົ້າໜ້າທີ່ທະຫານມຽນມາໄດ້ອອກຖະແຫຼງການປະຕິເສດເລື່ອງດັ່ງກ່າວໃນວັນທີ 6 ກັນຍານີ້.
ທັງນີ້, ກະຊວງການຕ່າງປະເທດບັງກາລາເດັດໄດ້ສົ່ງຈົດໝາຍປະທ້ວງຕໍ່ສະຖານທູດມຽນມາປະຈຳປະເທດຕົນໃນວັນທີ 1 ກັນຍານີ້ວ່າ, ເຮລີກົບແຕຂອງກອງທັບມຽນມາໄດ້ບິນຜ່ານນ່ານຟ້າປະເທດຕົນ ເຊິ່ງບໍ່ມີຜົນດີຕໍ່ມິດຕະພາບສອງປະເທດ ແລະອາດຈະເຮັດໃຫ້ເກີດເລື່ອງທີ່ຄາດບໍ່ເຖິງ. ຈາກນີ້ ຈຶ່ງຮຽກຮ້ອງໃຫ້ມຽນມາໃຊ້ມາດຕະການດ່ວນ ເພື່ອຫຼີກເວັ້ນເຫດການລັກສະນະນີ້.
ຈາກນັ້ນ, ເຈົ້າໜ້າທີ່ທະຫານມຽນມາກໍໄດ້ອອກຖະແຫຼງການໃນວັນທີ 6 ກັນຍານີ້ວ່າ, ເລື່ອງທີ່ລະບຸໃນຈົດໝາຍປະທ້ວງຂອງບັງກາລາເດັດນັ້ນ, ກອງທັບອາກາດປະເທດຕົນ ໄດ້ດຳເນີນການສືບສວນໃນວັນທີ 1 ກັນຍາຜ່ານມາ ໂດຍສະເພາະສືບສວນຮອຍ GPS ຂອງເຮລີກົບແຕດັ່ງກ່າວແລ້ວເຫັນວ່າ, ມີແຕ່ບິນຜ່ານ, ບິນຂຶ້ນແລະລົງຈອດຢູ່ເຂດທີ່ຫ່າງຈາກຊາຍແດນບັງກາລາເດັດຫຼາຍຮ້ອຍແມັດໃນວັນທີ 27 ສິງຫາ ແລະວັນທີ 1 ກັນຍາເທົ່ານັ້ນ, ສ່ວນວັນທີ 28 ສິງຫາຜ່ານມາ, ກໍບໍ່ໄດ້ບິນຢູ່ໃກ້ຊາຍແດນແຕ່ປະການໃດ.