ຕາມຂ່າວCRI: ວັນທີ 8 ກັນຍານີ້, ພິທີເປີດປ້າຍຫ້ອງການພົວພັນຊົ່ວຄາວ ເນປີດໍຂອງສະຖານທູດຈີນປະຈຳມຽນມາໄດ້ຈັດຂຶ້ນຢູ່ນະຄອນຫຼວງເນປີດໍປະເທດມຽນມາ ເຊິ່ງເປັນອົງການການທູດຊົ່ວຄາວປະຈຳເນປີດໍແຫ່ງທຳອິດທີ່ລັດຖະບານມຽນມາອະນຸມັດໃຫ້ສ້າງຕັ້ງຂຶ້ນ. ທ່ານຮົງລ້ຽງ ເອກອັກຄະລັດຖະທູດຈີນປະຈຳມຽນມາ ແລະ ທ່ານຄວຍຕິນດ໌ ລັດຖະມົນຕີກະຊວງການຕ່າງປະເທດມຽນມາໄດ້ເຂົ້າຮ່ວມພິທີ ແລະ ກ່າວປາໄສ.ເຈົ້າໜ້າທີ່ໜ້າກະຊວງພາຍໃນ, ກະຊວງການຕ່າງປະເທດ ແລະ ຄະນະກຳມະການບໍລິຫານງານນະຄອນຫຼວງເນປີດໍມຽນມາ ພ້ອມດ້ວຍເຈົ້າໜ້າທີ່ການທູດຈີນປະຈຳສະຖານທູດມຽນມາສ່ວນໜຶ່ງ ເກືອບຮ້ອຍຄົນໄດ້ເຂົ້າຮ່ວມພິທີດັ່ງກ່າວ.
ໃນເວລາກ່າວ ປາໄສ, ທ່ານຮົງລ້ຽງກ່າວວ່າ, ສະຖານທູດຈີນປະຈຳມຽນມາແມ່ນອົງການຈັດຕັ້ງຕ່າງປະເທດແຫ່ງທຳອິດທີ່ສະເໜີສ້າງຕັ້ງຫ້ອງການພົວພັນເປັນຊົ່ວຄາວຢູ່ນະຄອນຫຼວງເນປີດໍ, ເຊິ່ງສະແດງໃຫ້ເຫັນຢ່າງເຕັມທີ່ວ່າ ຈີນເອົາໃຈໃສ່ສູງຕໍ່ການຂະຫຍາຍການພົວພັນກັບມຽນມາ. ປັດຈຸບັນ, ຈີນ ກັບ ມຽນມາກຳລັງຈັດການຮ່ວມມືຢ່າງໃກ້ຊິດ, ຮ່ວມກັນສ້າງ 'ໜຶ່ງແລວທາງ ໜຶ່ງເສັ້ນທາງ', ການພົວພັນລະຫວ່າງສອງປະເທດພວມມຸ່ງໜ້າໄປສູ່ອະນາຄົດແຫ່ງການພັດທະນາທີ່ກວ້າງຂວາງ. ຫ້ອງການພົວພັນຊົ່ວຄາວເນປີດໍເລີ່ມເປີດນຳໃຊ້ຢ່າງເປັນທາງການຈະເຮັດໃຫ້ການພົວພັນລະຫວ່າງສະຖານທູດຈີນປະຈຳມຽນມາ ກັບ ລັດຖະບານມຽນມາແໜ້ນແຟ້ນກວ່າເກົ່າ, ແລະຮ່ວມມືກັນໄດ້ຢ່າງສະດວກກວ່າເກົ່າ.
ທ່ານຄວຍຕິນດ໌ຍິນດີຕ້ອນຮັບສະຖານທູດຈີນປະ ຈຳມຽນມາສ້າງຕັ້ງຫ້ອງການພົວພັນຊົ່ວຄາວເນປີດໍ ແລະກ່າວວ່າ ບໍ່ວ່າໃນປະຫວັດສາດເນປີດໍ ຫຼຶື ການພົວພັນມຽນມາ-ຈີນ ລ້ວນແຕ່ເປັນຫຼັກໝາຍທາງອັນສຳຄັນ. ທ່ານຍັງກ່າວວ່າ, ຈີນສ້າງຕັ້ງສະຖານທູດຈີນປະຈຳມຽນມາໃນວັນທີ 28 ມິຖຸນາປີ 1950, ມາຮອດປັດຈຸບັນໄດ້ເປັນເວລາ 67 ປີແລ້ວ. ປັດຈຸບັນ, ຜູ້ ນຳສອງປະເທດໄດ້ສ້າງຄວາມໄວ້ເນື້ອເຊື່ອໃຈກັນ ແລະ ມິດຕະພາບຕໍ່ກັນຢ່າງແໜ້ນແຟ້ນ, ການພົວພັນລະຫວ່າງສອງປະເທດໄດ້ຂະຫຍາຍຕົວຢ່າງເດັ່ນຊັດ. ມຽນມາ ກັບ ຈີນ, ບໍ່ພຽງແຕ່ໄດ້ເພີ່ມທະວີໄມຕີຈິດມິດຕະພາບ ແລະ ການຮ່ວມມືລະຫວ່າງສອງຝ່າຍເທົ່ານັ້ນ, ຍັງໄດ້ຮັກສາການຮ່ວມມືຍຸດທະສາດໃນວຽກງານພາກພື້ນ, ວຽກງານສາກົນ ແລະ ໃນເວທີອົງການສະຫະປະຊາຊາດ.