ວັນທີ 9 ກັນຍານີ້, ກອງປະຊຸມປະສົມສະຖາບັນຂົງຈື້ອາຊີ "ໜຶ່ງແລວທາງໜື່ງເສັ້ນທາງ"ໄດ້ຈັດຂື້ນຢູ່ນະຄອນຫຼວງບາງກອກຂອງໄທ, ຜູ້ຕາງໜ້າ 250 ກວ່າທ່ານຂອງສະຖາບັນຂົງຈື້ 77 ແຫ່ງ, ທີ່ມາຈາກ 30 ປະເທດອາຊີແຄມ"ໜຶ່ງແລວທາງໜື່ງເສັ້ນທາງ", ໂຮງຮຽນຮ່ວມມືຝ່າຍຈີນຈຳນວນໜຶ່ງແລະວິສາຫະກິດຈີນຢູ່ໄທເຂົ້າຮ່ວມ.
ໃນກອງປະຊຸມທີ່ໄຂເປັນເວລາສອງວັນເທື່ອນີ້, ຜູ້ຕາງໜ້າຈະລົງເລິກຄົ້ນຄວ້າປຶກສາຫາລືກັນ ໂດຍປິ່ນອ້ອມຫົວຂໍ້ຕ່າງໆ ເຊັ່ນ "ໜຶ່ງແລວທາງໜື່ງເສັ້ນທາງ"ກັບການພັດທະນາສະຖາບັນຂົງຈື້, ການສ້າງສາເນື້ອໃນແລະພັດທະນາສະຖາບັນຂົງຈື້ຢ່າງມີລັກສະນະພິເສດ, ການສ້າງຖັນແຖວຄູສອນຂອງທ້ອງຖິ່ນ ແລະອື່ນໆ. ກອງປະຊຸມຍັງໄດ້ເຊີນນັກວິຊາການຜູ້ມີຊື່ສຽງຂອງຈີນ, ໄທ, ຕວກກີ, ປາກິສະຖານ, ກາຊັກສະຖານ, ສະຫະລັດເອມີເຣດອາຣັບ ຮ່ວມກັນຈັດເວທີປຶກສາຫາລືຜູ້ຊ່ຽວຊານກ່ຽວກັບ"ໜຶ່ງແລວທາງໜື່ງເສັ້ນທາງ", ພ້ອມກັນຄົ້ນຄວ້າໂອກາດແລະສິ່ງທ້າທາຍທີ່ການເຊື່ອມໂຍງເຂົ້າກັນລະຫວ່າງຂໍ້ລິເລີ່ມ"ໜຶ່ງແລວທາງໜື່ງເສັ້ນທາງ" ແລະຍຸດທະສາດພັດທະນາຂອງບັນດາປະເທດນັ້ນນຳມາໃຫ້ສະຖາບັນຂົງຈື້, ແລະປະກອບຄຳຄິດຄຳເຫັນໃຫ້ສະຖາບັນຂົງຈື້ໃນການບໍລິການເປັນຢ່າງດີກວ່າເກົ່າໃຫ້ແກ່ປະເທດແຄມແລວທາງ.
ຂ່າວແຈ້ງວ່າ, ມາຮອດປັດຈຸບັນ, ຢູ່ລຽບຕາມ"ໜຶ່ງແລວທາງໜື່ງເສັ້ນທາງ" ມີ 51 ປະເທດໄດ້ສ້າງຕັ້ງສະຖາບັນຂົງຈື້ 135 ແຫ່ງແລະ ຫ້ອງຮຽນຂົງຈື້ 129 ແຫ່ງ, ໃນນັ້ນ 30 ປະເທດອາຊີໄດ້ສ້າງຕັ້ງສະຖາບັນຂົງຈື້ 77 ແຫ່ງແລະ ຫ້ອງຮຽນຂົງຈື້ 79 ແຫ່ງ.