ອົງ​ການ​ທ່ອງ​ທ່ຽວ​ແຫ່ງ​ຊາດ​ຈີນ: "ໜຶ່ງ​ແລວ​ທາງ​ໜຶ່ງ​ເສັ້ນ​ທາງ" ຈະ​ສ້າງ​ຕະ​ຫຼາດ​ທ່ອງ​ທ່ຽວ​ສາ​ກົນກວ້າງ​ຂວາງກວ່າ​ເກົ່າ​ໃຫ້​ແກ່​ອາ​ຊຽນ
2017-09-10 15:31:24  cri 
ກອງ​ປະ​ຊຸມ​ເວ​ທີ​ປຶກ​ສາ​ຫາ​ລື​ເຈົ້າ​​ເມືອງ​ຈີນ-ອາ​ຊຽນ​ 2017 ໄດ້​ຈັດ​ຂຶ້ນ​ຢູ່​​ເມືອງ​ນານ​ນິງ​ເຂດກວາງ​ຊີ​ ສ​ປ ຈີນ​ໃນ​ວັນ​ທີ 9 ກັນ​ຍາ​ນີ້, ​ແຂກ​ມີ​ກຽດ 300 ທ່ານ​ຈາກເກືອບ 100 ເມືອງ​ຂອງຈີນ​ແລະ​ປະ​ເທດ​ອາ​ຊຽນ​ໄດ້​ເຕົ້າ​ໂຮມ​ກັນ, ດຳ​ເນີນ​ການ​ປຶກ​ສາ​​ຫາ​ລືຢ່າງ​ເລິກ​ເຊິ່ງ​ກ່ຽວ​ກັບ​ຫົວ​ຂໍ້ "ກຳ​ໂອ​ກາດ​ການ​ກໍ່​ສ້າງ 'ໜຶ່ງ​ແລວ​ທາງ​ໜຶ່ງ​ເສັ້ນ​ທາງ', ຊຸກ​ຍູ້​ກາ​ນ​ຮ່ວມ​ມື​ການ​ທ່ອງ​ທ່ຽວ​ລະ​ຫວ່າງ​ຈີນ-ອາ​ຊຽນ".

ທ່ານ​ວາງ​ສຽວ​ເຟີ່ງ ຮອງ​ຫົວ​ໜ້າ​​ອົງ​ການ​ທ່ອງ​ທ່ຽວ​ແຫ່​ງ​ຊາດ​ຈີນ​ກ່າວ​ວ່າ, ຂໍ້​ລິ​ເລີ່ມ "ໜຶ່ງ​ແລວ​ທາງ​ໜຶ່ງ​ເສັ້ນ​ທາງ" ສະ​ເໜີ​ອອກ 4 ປີ​ຜ່ານມາ, ຕົວ​ເມືອງ​ຂອງ​ຈີນ​ແລະ​ປະ​ເທດ​ອາ​ຊຽນ​ໄດ້​ມີ​ການ​ພົວ​ພັນ​ໃກ້​ຊິດກວ່າ​ເກົ່າ, ແລະ​ໄດ້​ຈໍ່​ຕົວ​ເປັນ​ສະ​ຖາ​ນະ​​ການ​ພັດ​ທະ​ນາ​ການ​ທ່ອງ​ທ່ຽວ​ທີ່​ເພີ່ນ​ພາ​ອາ​ໄສ​ກັນ​ແລະ​ຕ່າງ​ຝ່າຍ​ຕ່າງ​ມີ​ຜົນ​ປະ​ໂຫຍດ, ບາດ​ກ້າວ​ການ​ປ່ຽນ​ແປງ​ຮູບ​ການ​ພັດ​ທະ​ນາ​ແລະ​ຍົກ​ລະ​ດັບ​ຂອງ​ຂະ​ແໜງ​ການ​ທ່ອງ​ທ່ຽວ​ກໍ​ເພີ່ມ​ຂຶ້ນ​ເທື່ອ​ລະ​ກ້າວ. ຂໍ້​ລິ​ເລີ່ມ "ໜຶ່ງ​ແລວ​ທາງ​ໜຶ່ງ​ເສັ້ນ​ທາງ" ຈະ​ສ້າງ​ຕະ​ຫຼາດ​ທ່ອງ​ທ່ຽວ​ສາ​ກົນ​ຢ່າງກວ້າງ​ຂວາງ​ໃຫ້​ແກ່​​ບັນ​ດາປະ​ເທດ​ອາ​ຊຽນ​, ແລະ​ຈະ​ຊຸກ​ຍູ້​ພັດ​ທະ​ນາ​ເສດ​ຖະ​ກິດ​ສັງ​ຄົມ​ແລະ​ປັບ​ປຸງ​ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ​ຂອງ​ພາກ​ພື້ນ​ໃຫ້​ດີ​ຂຶ້ນ.

ທ່ານ​ວາງ​ສຽວ​ເຟີ່ງ​ກ່າວ​ຕື່ມ​ວ່າ, ຄຽງ​ຄູ່​ກັບ​ໃຈ​ກາ​ງ​ຂະ​ແໜງ​ການ​ທ່ອງ​ທ່ຽວ​ຂອງ​ໂລກ​ຍ້າຍ​ໄປ​ທາງ​ຕາ​ເວັນ​ອອກ, ຈີນ​ແລະ​ອາ​ຊຽນ​ພວມ​ກາຍ​ເປັນ​ກຳ​ລັງ​ສຳ​ຄັນ​ຂອງ​ຂະ​ແໜງ​ການ​ທ່ອງ​ທ່ຽວ​ຂອງ​ໂລກ, ຄວນ​ສວຍ​ໃຊ້​ໂອ​ກາດ​ການ​ກໍ່​ສ້າງ "ໜຶ່ງ​ແລວ​ທາງ​ໜຶ່ງ​ເສັ້ນ​ທາງ", ເຮັດ​ໃຫ້​ຕົວ​ເມືອງ​ແລະ​ປະ​ຊາ​ຊົນ​​ເຂົ້າ​ຮ່ວມ​ການ​ພັດ​ທະ​ນາ​ຂະ​ແໜງ​ການ​ທ່ອງ​ທ່ຽວ ຫຼາຍ​ກວ່າ​ເກົ່າ, ແລະ​ແບ່ງ​ປັນ​ໂອ​ກາດ​ຂອງ​ຍຸກ​ສະ​ໄໝຮ່ວມ​ກັນ.
ຂ່າວ-ບົດທີ່ກ່ຽວຂ້ອງ
ຜູ້ດຳເນີນລາຍການ