ທ່ານປຣະວິດ ວົງສຸວັນ ຮອງນາຍົກລັດຖະມົນຕີ ທັງເປັນລັດຖະມົນຕີປ້ອງກັນຊາດໄທເປີດເຜີຍໃນວັນທີ 8 ກັນຍານີ້ວ່າ, ມີຄວາມຄືບໜ້າຕໍ່ກໍລະນີການໂຕນໜີຂອງທ່ານນາງຍິ່ງລັກ ຊິນນະວັດ ອະດີດນາຍົກລັດຖະມົນຕີໄທ ໂດຍກ້ອງວົງຈອນປິດຈັບພາບໄດ້ວ່າ, ທ່ານໄດ້ຂີ່ລົດເກັ໋ງຄັນໜຶ່ງຜ່ານດ່ານທະຫານແຫ່ງໜຶ່ງຢູ່ແຂວງສະແກ້ວ ທາງພາກຕາເວັນອອກຂອງປະເທດ.
ທ່ານປຣະວິດກ່າວວ່າ, ກ້ອງວົງຈອນປິດດັ່ງກ່າວບໍ່ສາມາດຕິດຕາມຂໍ້ມູນອື່ນໆຂອງລົດຄັນນີ້ ຈິ່ງບໍ່ມີຫຼັກຖານສະແດງໃຫ້ເຫັນວ່າ ລົດຄັນນີ້ໄດ້ຂ້າມຊາຍແດນແລ້ວເຂົ້າສູ່ກຳປູເຈຍ. ເຈົ້າໜ້າທີ່ໄທພວມສືບຫາຜູ້ຂັບລົດ, ແຕ່ຢູ່ເຂດດັ່ງກ່າວມີເສັ້ນທາງຫຼາຍສາຍສາມາດໂຕນໜີອອກຈາກປະເທດໄທ. ສະນັ້ນ, ເຈົ້າໜ້າທີ່ລັດຖະບານພວມສືບຫາເສັ້ນທາງທີ່ທ່ານນາງຍິ່ງລັກອາດຈະຜ່ານ.
ສານດີການພະແນກຄະດີອາຍາຂອງຜູ້ດຳລົງຕຳແໜ່ງທາງການເມືອງຂອງໄທໄດ້ຕັດສິນຄະດີໂຄງການຈຳນຳເຂົ້າຂອງທ່ານນາງຍິ່ງລັກໃນວັນທີ 25 ສິງຫາຜ່ານມາ, ແຕ່ທ່ານນາງຍິ່ງລັກບໍ່ໄດ້ຂຶ້ນສານ ດ້ວຍຂໍ້ອ້າງບໍ່ສະບາຍ. ຫຼັງຈາກນັ້ນສານໄດ້ອອກຄຳສັ່ງຈັບທ່ານທັນທີ. ຂະນະດຽວກັນ ກໍມີຂ່າວນຳຫຼັງວ່າ ທ່ານນາງຍິ່ງລັກໄດ້ໂຕນໜີອອກຈາກປະເທດໄທ.