ເຈົ້າໜ້າທີ່ລັດຖະບານມຽນມາຢືນຢັນໃນຕອນຄ່ຳວັນທີ 10 ກັນຍານີ້ວ່າ, ຢູ່ແຂວງມາກວາຍ ທາງພາກກາງຂອງປະເທດຕົນໄດ້ເກີດເຫດຈະລາຈົນ ເຊິ່ງໄດ້ທຳລາຍເຮືອນປະຊາຊົນແລະຮ້ານຄ້າ ແລະຈາກນັ້ນເຈົ້າໜ້າທີ່ຕຳຫຼວດກໍໄປເຖິງຈຸດເກີດເຫດແລະໄລ່ພວກກໍ່ເຫດຈະລາຈົນ.
ເຈົ້າໜ້າທີ່ຄະນະກຳມະການຖະແຫຼງຂ່າວທຳນຽບທີ່ປຶກສາແຫ່ງລັດມຽນມາໄດ້ອອກແຈ້ງການໃນຕອນຄ່ຳວັນທີ 10 ກັນຍານີ້ວ່າ, ຕອນຄ່ຳມື້ດັ່ງກ່າວ, ກຸ່ມບໍ່ຫວັງດີປະມານ 50 ຄົນໄດ້ຖືໄມ້ຄ້ອນ, ມີດ ເຂົ້າເຮືອນປະຊາຊົນແລະຮ້ານຄ້າຢູ່ເຂດໜຶ່ງຂອງແຂວງມາກວາຍ ແລະຫຼັງເຈົ້າໜ້າທີ່ຕຳຫຼວດໄດ້ຮັບຂ່າວແລ້ວກໍໄດ້ໄປເຖິງສະຖານທີ່ເກີດເຫດແລະປະເຊີນໜ້າກັບກຸ່ມກໍ່ເຫດ, ຂະນະນັ້ນ, ກໍມີກຸ່ມບໍ່ຫວັງດີອີກກຸ່ມໜຶ່ງທີ່ຖືກ້ອນຫີນໄດ້ເຂົ້າມາເຖິງຈຸດເກີດເຫດ. ເມື່ອເຈົ້າໜ້າທີ່ຕຳຫຼວດກ່າວຕັກເຕືອນແລ້ວບໍ່ໄດ້ຜົນ ຈິ່ງໄດ້ໃຊ້ໂລ້ກຳບັງຂັບໄລ່ກຸ່ມດັ່ງກ່າວ.
ຕອນຄ່ຳມື້ດຽວກັນ, ເຈົ້າໜ້າທີ່ຕຳຫຼວດແຂວງດັ່ງກ່າວເປີດເຜີຍວ່າ, ເຂດດັ່ງກ່າວໄດ້ກັບຄືນສູ່ຄວາມສະຫງົບແລ້ວ ແລະພວມຊອກຈັບຫົວໂປ່ຜູ້ກໍ່ເຫດ.
 |
