ພິທີເປີດງານວາງສະແດງສິນຄ້າຈີນ-ອາຊຽນແລະກອງປະຊຸມສຸດຍອດທຸລະກິດແລະການລົງທຶນຈີນ-ອາຊຽນຄັ້ງທີ 14 ໄດ້ຈັດຂຶ້ນໃນຕອນເຊົ້າວັນທີ 12 ກັນຍານີ້ຢູ່ເມືອງນານນິງ ເທດສະບານເຂດປົກຄອງຕົນເອງເຜົ່າຈ້ວງກວາງຊີ ສປ ຈີນ ໂດຍທ່ານຈ່າງກ້າວລີ້ ກຳມະການປະຈຳກົມການເມືອງສູນກາງພັກກອມມູນິດຈີນ, ຮອງນາຍົກລັດຖະມົນຕີຈີນໄດ້ກ່າວປາໄສໃນຫົວຂໍ້ສະເພາະ ແລະທ່ານສົມເດັດຮາຈີ ຮາຊັນນານ ປະເທດບຣູໄນ, ທ່ານຮຸນແຊນ ນາຍົກລັດຖະມົນຕີກຳປູເຈຍ, ທ່ານເຈືອງຮວາບິງ ຮອງນາຍົກລັດຖະມົນຕີຫວຽດນາມຜູ້ປະຈຳການ, ທ່ານສອນໄຊ ສີພັນດອນ ຮອງນາຍົກລັດຖະມົນຕີລາວ ແລະທ່ານອັສຄານ ມາມິນ ນາຍົກລັດຖະມົນຕີຜູ້ທີໜຶ່ງຂອງກາຊັກສະຖານຕ່າງກໍໄດ້ກ່າວປາໄສໃນພິທີດັ່ງກ່າວ.
ທ່ານຈ່າງກ່າວລີ້ຊີ້ໃຫ້ເຫັນວ່າ: ຈີນເສີມຂະຫຍາຍມິດຕະພາບແລະການຮ່ວມມືກັບອາຊຽນຢ່າງເດັດດ່ຽວໜຽວແໜ້ນ. ທັງນີ້ງານວາງສະແດງສິນຄ້າຈີນ-ອາຊຽນ, ກອງປະຊຸມສຸດຍອດທຸລະກິດແລະການລົງທຶນຈີນ-ອາຊຽນໄດ້ກາຍເປັນຂົວຕໍ່ອັນສຳຄັນສຳລັບຈີນແລະປະເທດໃນອາຊຽນໃນການເພີ່ມຄວາມໄວ້ເນື້ອເຊື່ອໃຈກັນ, ເປັນເວທີສຳຄັນແຫ່ງການຮ່ວມມືດ້ານເສດຖະກິດການຄ້າ, ເປັນຂົວຕໍ່ສຳຄັນເພື່ອເພີ່ມທະວີການແລກປ່ຽນລະຫວ່າງປະຊາຊົນແລະຫວັງວ່າໃນທ່າມກາງກະແສຍຸກສະໄໝແຫ່ງການຮ່ວມສ້າງ "ໜຶ່ງແລວທາງໜຶ່ງເສັ້ນທາງ",ບັນດາຝ່າຍຈະບັນລຸຄວາມເປັນເອກະພາບກັນ, ສ້າງໂອກາດການຄ້າ ແລະໄດ້ຮັບຜົນສຳເລັດຫຼາຍກວ່າເກົ່າ.