ໃນເວທີປຶກສາຫາລືວັດທະນະທຳຈີນ-ອາຊຽນຄັ້ງທີ 12 ທີ່ຈັດຂຶ້ນຢູ່ເມືອງນານນິ່ງເຂດກວາງຊີ ສປ ຈີນ, ຜູ້ຮັບຜິດຊອບຂະແໜງການວັດທະນະທຳ ແລະ ອະທິການບໍດີມະຫາວິທະຍາໄລສິລະປະຂອງຈີນແລະ 10 ປະເທດອາຊຽນ ໄດ້ອອກ "ຂໍ້ລິເລີ່ມນານນິງກອງປະຊຸມໂຕະມົນອະທິການບໍດີມະຫາວິທະຍາໄລສິລະປະຈີນ-ອາຊຽນ" ເພື່ອຊຸກຍູ້ການຮ່ວມມືແລະການພັດທະນາລະຫວ່າງສອງຝ່າຍໃຫ້ສູງຂຶ້ນຕື່ມອີກ.
ຂໍ້ລິເລີ່ມດັ່ງກ່າວປະກອບມີ 4 ຂໍ້ຄື: ໜຶ່ງ, ຊຸກຍູ້ວຽກງານຢ້ຽມຢາມລະຫວ່າງມະຫາວິທະຍາໄລຕ່າງໆທີ່ເຂົ້າຮ່ວມກອງປະຊຸມດັ່ງກ່າວ, ເພີ່ມທະວີການວາງແຜນຍຸດທະສາດ ແລະຊຸກຍູ້ການພັດທະນາການສຶກສາສິລະປະຢ່າງກົມກຽວກັນ; ສອງ, ເພີ່ມທະວີການແລກປ່ຽນແລະຍົກລະດັບຊັບພະຍາກອນຄຸ້ມຄອງການສຶກສາສິລະປະແລະອາຈານວິຊາສະເພາະຂອງຝ່າຍຕ່າງໆທີ່ເຂົ້າຮ່ວມກອງປະຊຸມ; ສາມ, ສະໜັບສະໜູນນັກສຶກສາມະຫາວິທະຍາໄລເຫຼົ່ານີ້ຢ້ຽມຢາມເຊິ່ງກັນແລະກັນ, ຈັດການສະແດງເພື່ອແລກປ່ຽນກັນ ແລະສຸດທ້າຍ, ຕັ້ງໜ້າເຂົ້າຮ່ວມການສະແດງຜົນງານການສຶກສາສິລະປະຈີນ-ອາຊຽນ "ກອງທອງ" , ຍົກລະດັບການສະແດງໃຫ້ສູງຂຶ້ນ ແລະຊຸກຍູ້ການຮ່ວມກັນຊົມໃຊ້ຜົນງານການສຶກສາສິລະປະ.
 |
