ກົມຄຸ້ມຄອງກິດຈະການທາງທະເລແລະທ່າກຳປັ່ນສິງກະໂປເປີດເຜີຍໃນຄືນວັນທີ 13 ກັນຍານີ້ວ່າ: ເຮືອດູດຊາຍທີ່ຫຼົ້ມຢູ່ເຂດທະເລສິງກະໂປໃນຕອນຮຸ່ງເຊົ້າວັນດັ່ງກ່າວນັ້ນມີຜູ້ຫາຍສາບສູນ 5 ຄົນ, ໃນນີ້ ສາມາດພົບສົບສອງຄົນແລ້ວ. ຫຼັງສັນນະສູດແລ້ວພົບວ່າ ຜູ້ໜຶ່ງເປັນລູກເຮືອສັນຊາດຈີນແລະອີກຜູ້ໜຶ່ງເປັນສັນຊາດມາເລເຊຍ.
ສະຖານທູດຈີນປະຈຳສິງກະໂປໄດ້ເປີດເຜີຍຕໍ່ສື່ມວນຊົນວ່າ, ຕອນຮຸ່ງເຊົ້າວັນທີ 13 ກັນຍານີ້, ເຮືອດູດຊາຍທີ່ລົງທະບຽນຢູ່ສະຫະພັນໂດມີນີກາໂດຍມີລູກເຮືອສັນຊາດຈີນ 11 ຄົນແລະລູກເຮືອສັນຊາດມາເລເຊຍ 1 ຄົນລຳໜຶ່ງໄດ້ຫຼົ້ມຫຼັງຕຳກຳປັ່ນຂົນສົ່ງນ້ຳມັນທີ່ລົງທະບຽນຢູ່ອິນໂດເນເຊຍລຳໜຶ່ງຢູ່ເຂດທະເລສິງກະໂປ. ປັດຈຸບັນ,ສາມາດຢືນຢັນໄດ້ວ່າ ລູກເຮືອສັນຊາດຈີນ 1 ຄົນແລະລູກເຮືອສັນຊາດມາເລເຊຍ 1 ຄົນໄດ້ເສຍຊີວິດ, ຂະນະທີ່ລູກເຮືອສັນຊາດຈີນ 3 ຄົນ ຫາຍສາບສູນ ແລະ 7 ຄົນໄດ້ຮັບການຊ່ວຍເຫຼືອ.
ປັດຈຸບັນ, ລູກເຮືອສັນຊາດຈີນ 7 ຄົນທີ່ໄດ້ຮັບການຊ່ວຍເຫຼືອນັ້ນໄດ້ສົ່ງໄປປິ່ນປົວຢູ່ໂຮງໝໍສູນກາງສິງກະໂປ, ໃນນີ້ ມີໜຶ່ງຄົນໄດ້ຮັບບາດເຈັບຢູ່ເອິກແລະຫົວ, ແຕ່ໂດຍລວມແລ້ວມີອາການຄົງຕົວ, ອີກ 6 ຄົນໄດ້ອອກໂຮງໝໍແລ້ວ.
