ກອງປະຊຸມເວທີປຶກສາຫາລືຜູ້ນຳການຮ່ວມມືກັບການພັດທະນາການທະນາຄານຈີນ-ອາຊຽນຄັ້ງທີ 9 ໄດ້ຈັດຂຶ້ນໃນວັນທີ 13 ກັນຍານີ້ຢູ່ເມືອງນານນິງ ເຂດປົກຄອງຕົນເອງເຜົ່າຈ້ວງກວາງຊີ ສປ ຈີນໂດຍເຈົ້າໜ້າທີ່ອາວຸໂສທະນາຄານກາງ, ຜູ້ຊີ້ນຳສະຖາບັນການເງິນຂອງຈີນແລະບັນດາປະເທດໃນອາຊຽນໄດ້ປຶກສາຫາລືໃນຫົວຂໍ້ "ລົງເລິກການຮ່ວມມືດ້ານການທະນາຄານ,ຮ່ວມກັນສ້າງໜຶ່ງແລວທາງໜຶ່ງເສັ້ນທາງ".
ທ່ານຢິ່ນຢົງ ຮອງຜູ້ວ່າການທະນາຄານປະຊາຊົນຈີນເຫັນວ່າ ການສ້າງ "ໜຶ່ງແລວທາງໜຶ່ງເສັ້ນທາງ"ໄດ້ເປີດໂອກາດແລະອະນາຄົດຢ່າງກວ້າງຂວາງໃຫ້ແກ່ການຮ່ວມມືດ້ານການທະນາຄານລະຫວ່າງຈີນ-ອາຊຽນ, ຂະນະທີ່ການຮ່ວມມືດ້ານອື່ນໆເປັນຕົ້ນ ການເຊື່ອມຈອດຂ້າມຊາດ, ຄວາມສາມາດການຜະລິດສາກົນແລະການຜະລິດອຸປະກອນກໍໄດ້ກະຕຸ້ນໃຫ້ມີຄວາມຕ້ອງການໃໝ່, ແຕ່ກໍຕ້ອງການທຶນຢ່າງຫຼວງຫຼາຍ. ຈາກນີ້ຈິ່ງຕ້ອງການຫາລືຕື່ມອີກວ່າຈະເຮັດແນວໃດເພື່ອລົງເລິກການຮ່ວມມືດ້ານການລົງທຶນແລະການລະດົມທຶນລະຫວ່າງສອງຝ່າຍ. ປັດຈຸບັນ, ອາຊຽນໄດ້ສ້າງຕັ້ງສະຖາບັນການທະນາຄານ 30 ກວ່າແຫ່ງຢູ່ຈີນ, ຂະນະທີ່ທະນາຄານຈີນກໍໄດ້ຮ່ວມກັບທະນາຄານຂອງບັນດາປະເທດໃນອາຊຽນສ້າງຕັ້ງທະນາຄານຕົວແທນ,ທະນາຄານບັນຊີຕ່າງປະເທດຫຼາຍກວ່າ 150 ແຫ່ງແລ້ວ.
ຜູ້ຊ່ວຍຜູ້ວ່າການທະນາຄານ ສປປ ລາວຢືນຢັນວ່າ ເຖິງວ່າເສດຖະກິດໂລກພັດທະນາຊ້າລົງກໍຕາມ, ແຕ່ການຄ້າລະຫວ່າງລາວ-ຈີນໄດ້ຂະຫຍາຍຕົວຢ່າງຕໍ່ເນື່ອງ. ແນວໃດກໍດີ, ລາວສະໜັບສະໜູນຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ"ຂອງຈີນ ແລະຫວັງຈະເພີ່ມທະວີການຮ່ວມມືດ້ານການທະນາຄານລະຫວ່າງສອງຝ່າຍຕື່ມອີກ.
 |
