ໃນກອງປະຊຸມການຮ່ວມມືປະດິດສ້າງໃໝ່ແລະຖ່າຍທອດເຕັກນິກຈີນ-ອາຊຽນຄັ້ງທີ 5 ທີ່ຈັດຂຶ້ນຢູ່ເມືອງນານນິງເຂດກວາງຊີ ສປ ຈີນໃນວັນທີ 13 ກັນຍານີ້, ສູນຖ່າຍທອດເຕັກນິກສອງຝ່າຍຈີນ-ອາຊຽນໄດ້ສ້າງແລະປະຕິບັດກົນໄກຮ່ວມມືການຖ່າຍທອດເຕັກນິກຕົວຈິງສອງຝ່າຍກັບບຣູໄນ, ອິນໂດເນເຊຍແລະຫວຽດນາມ. ສົ່ງຜົນເຮັດໃຫ້ມາຮອດປັດຈຸບັນ, ມີ 8 ປະເທດໃນອາຊຽນແລ້ວທີ່ປະຕິບັດວຽກງານດັ່ງກ່າວ.
ກອງປະຊຸມດັ່ັງກ່າວໄດ້ເນັ້ນຫົວຂໍ້ "ການຮ່ວມມືແບບປະດິດສ້າງໃໝ່, ແບ່ງປັນຄວາມຜາສຸກຮ່ວມກັນ", ເພື່ອລົງເລິກການຮ່ວມມືດ້ານວິທະຍາສາດເຕັກນິກລະຫວ່າງຈີນກັບບັນດາປະເທດອາຊຽນຢ່າງບໍ່ຢຸດຢັ້ງ.
ເຈົ້າໜ້າທີ່ທີ່ກ່ຽວຂ້ອງຫຼາຍທ່ານຂອງຈີນແລະປະເທດອາຊຽນໄດ້ເປັນສັກຂີພິຍານຂອງພິທີເຊັນສັຍຍາໂຄງການຮ່ວມມືວິທະຍາສາດເຕັກນິກສຳຄັນຕ່າງໆເປັນຕົ້ນ: "ບົດບັນທຶກຄວາມເຂົ້າໃຈການຮ່ວມມືແບບປະດິດສ້າງໃໝ່ແລະການຖ່າຍທອດເຕັກນິກລະຫວ່າງສູນຖ່າຍທອດເຕັກນິກຈີນ-ອາຊຽນກັບກະຊວງພະລັງງານແລະອຸດສາຫະກຳບຣູໄນ", "ແຜນການປະຕິບັດງານລະຫວ່າງສູນຖ່າຍທອດເຕັກນິກຈີນ-ອາຊຽນແລະສູນຖ່າຍທອດເຕັກນິນກຈີນ-ອິນໂດເນເຊຍຂອງສະຖາບັນຄົ້ນຄວ້າວິທະຍາສາດອິນໂດເນເຊຍ"ແລະ "ບົດບັນທຶກຄວາມເຂົ້າໃຈລະຫວ່າງສູນຖ່າຍທອດເຕັກນິກຈີນ-ອາຊຽນແລະສູນຖ່າຍທອດເຕັກນິກຫວຽດນາມກ່ຽວກັບການຮ່ວມມືຊຸກຍູ້ການຖ່າຍທອດເຕັກນິກ" ແລະອື່ນໆ.