ທ່ານນາງຮວາຊຸນຢິງ ໂຄສົກກະຊວງການຕ່າງປະເທດຈີນຢືນຢັນໃນການຖະແຫຼງຂ່າວທີ່ຈັດຂຶ້ນໃນວັນທີ 14 ກັນຍານີ້ວ່າ: ຂໍພຽງແຕ່ເປັນປະໂຫຍດຕໍ່ການແກ້ໄຂບັນຫານິວເຄລຍແຫຼມເກົາຫຼີໂດຍສັນຕິແລະເປັນປະໂຫຍດຕໍ່ການສົ່ງເສີມໃຫ້ບັນດາຝ່າຍຟື້ນຟູການເຈລະຈາສັນຕິພາບ, ຈີນກໍຈະມີທ່າທີຕັ້ງໜ້າແລະເປີດປະຕູ ທັງຫວັງວ່າບັນດາຝ່າຍທີ່ກ່ຽວຂ້ອງຈະກຳໂອກາດແລະສະແດງໃຫ້ເຫັນຄວາມກ້າຫານທາງການເມືອງເພື່ອຕັດສິນທາງການເມືອງທີ່ຖືກຕ້ອງໂດຍໄວ.
ຂ່າວແຈ້ງວ່າ: ທ່ານອັນໂຕນິໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດເນັ້ນເມື່ອມໍ່ໆນີ້ວ່າ: ບັນດາຝ່າຍຄວນສຸມທຸກຄວາມພະຍາຍາມເພື່ອສ້າງເງື່ອນໄຂໃຫ້ແກ່ການແກ້ໄຂບັນຫານິວເຄລຍແຫຼມເກົາຫຼີດ້ວຍວິທີທາງການທູດແລະທາງການເມືອງ ທັງຢືນຢັນວ່າຍິນດີເປັນຜູ້ໄກ່ເກ່ຍໃນການແກ້ໄຂບັນຫາດັ່ງກ່າວ. ຕໍ່ກໍລະນີນີ້, ທ່ານນາງຮວາຊຸນຢິງໄດ້ເນັ້ນວ່າ ຈີນຊົມເຊີຍທຸກຄວາມພະຍາຍາມທີ່ເປັນປະໂຫຍດຕໍ່ການຊຸກຍູ້ໃຫ້ແຫຼມເກົາຫຼີບັນລຸການປອດອາວຸດນິວເຄລຍດ້ວຍວິທີທາງການທູດແລະທາງການເມືອງເພື່ອຮັກສາສັນຕິພາບແລະສະຖຽນລະພາບຂອງແຫຼມເກົາຫຼີ.