ຕາມຂ່າວCRI: ວັນທີ 15 ກັນຍານີ້, ພິທີເຊັນສັນຍາໂຄງການການຄ້າຈີນ-ປານາມາໄດ້ຈັດຂຶ້ນຢູ່ນະຄອນຫຼວງປານາມາຊີດີ, ວິສາຫະກິດຈີນກັບປານາມາໄດ້ເຊັນສັນຍາການຄ້າ 14 ສະບັບ, ເຊິ່ງມີຜະລິດຕະພັນກ່ຽວພັນເຖິງອາຫານທະເລ,ໄມ້, ບໍ່ແຮ່, ຜະລິດຕະພັນກະສິກຳແລະອື່ນໆ, ມູນຄ່າທັງໝົດມີເຖິງ 38 ລ້ານກວ່າໂດລາ.
ຄະນະຜູ້ແທນຊຸກຍູ້ການຄ້າຈີນປະກອບດ້ວຍຜູ້ແທນ 30 ກວ່າທ່ານທີ່ມາຈາກວິສາຫະກິດ 18 ແຫ່ງ, ເຊິ່ງໄດ້ເດີນທາງໄປຮອດປານາມາໃນວັນທີ 13 ກັນຍານີ້ເລີ່ມດຳເນີນການຢ້ຽມຢາມແລະສົນທະນາດ້ານເສດຖະກິດການຄ້າ, ຄາດຄະເນວ່າຈະສຳເລັດການຢ້ຽມຢາມໃນວັນທີ 16 ກັນຍານີ້.
ທ່ານຈື່ລູຊູນ, ຮອງຫົວໜ້າກົມການຄ້າກັບຕ່າງປະເທດຂອງກະຊວງການຄ້າຈີນກ່າວວ່າ, ປານາມາແມ່ນຄູ່ຮ່ວມມືດ້ານເສດຖະກິດການຄ້າທີ່ສຳຄັນຢູ່ທະວີບອາເມລິກາກາງຂອງຈີນ. ໃນຊຸມປີມໍ່ໆມານີ້, ການຄ້າສອງຝ່າຍໄດ້ຮັກສາທ່ວງທ່າການເຕີບໂຕທີ່ໄວສົມຄວນ. ການຢ້ຽມຢາມປານາມາຂອງຄະນະຜູ້ແທນວິສາຫະກິດຈີນໃນຄັ້ງນີ້ແມ່ນການຢ້ຽມຢາມປານາມາຄັ້ງທຳອິດນັບແຕ່ຈີນກັບປານາມາໄດ້ສ້າງສາຍພົວພັນທາງການທູດຢ່າງເປັນທາງການ. ຜະລິດຕະພັນຂອງຈີນສອດຄ່ອງກັບຄວາມຕ້ອງການໃນຊີວິດການເປັນຢູ່ຂອງປະຊາຊົນປານາມາ, ເຄື່ອງອຸປະກອບເຕັນໂນໂລຊີສອດຄ່ອງກັບຄວາມຕ້ອງການດ້ານການກໍ່ສ້າງຂອງປານາມາ. ພ້ອມກັນນັ້ນ, ຄວາມຕ້ອງການດ້ານການບໍລິໂພກທີ່ມີລັກສະນະຫຼາຍສີສັນແລະພະລັງງານການຜະລິດທີ່ມີທ່າແຮງຂອງຈີນ, ຈະສະໜອງຕະຫຼາດຢ່າງກວ້າງຂວາງໃຫ້ແກ່ການຈຳໜ່າຍຜະລິດຕະພັນຂອງປານາມາ.