ຕາມຂ່າວສານຊິ່ນຮວາ: ວັນທີ 16 ກັນຍານີ້, ທ່ານເດວິດ ບິສລີ, ຜູ້ບໍລິຫານງານຂອງສຳນັກງານແຜນການທັນຍາຫານໂລກຂອງສະຫະປະຊາຊາດຫຼື WFP ເປີດເຜີຍວ່າ, ຈະສະໜອງອາຫານທີ່ມີມູນຄ່າ 5 ລ້ານ 7 ແສນໂດລາເພື່ອຊ່ວຍເຫຼືອປະຊາຊົນກູບາທີ່ປະສົບລົມພາຍຸ ເອຍມາ.
ມື້ດຽວກັນ, ທ່ານບິສລີໄດ້ລົງຕິດຕາມສະພາບການຢູ່ເຂດຈາຍມານີທາທີ່ຢູ່ແຄມທະເລພາກຕາເວັນຕົກລາຮາວານ. ທ່ານບິສລີກ່າວວ່າ, ຄວາມພະຍາຍາມແລະການສຸມກຳລັງເພື່ອສ້າງບ້ານແປງເມືອງຄືນໃໝ່ຂອງປະຊາຊົນກູບາໄດ້ສ້າງພາບປະທັບໃຈຢ່າງເລິກເຊິ່ງໃຫ້ແກ່ຄົນທັງຫຼາຍ. ທ່ານກ່າວວ່າ, ການຊ່ວຍເຫຼືອຂອງ WFP ກັບການເຄື່ອນໄຫວກູ້ໄພຂອງລັດຖະບານກູບາສະໜັບສະໜູນກັນ, ເພື່ອຮັບປະກັນໃຫ້ປະຊາຊົນຜູ້ປະສັບໄພມີອາຫານການກິນທີ່ປອດໄພແລະໝັ້ນທ່ຽງ.
ແຕ່ວັນທີ 8 ຫາວັນທີ 10 ກັນຍານີ້, ລົມພາຍຸ ເອຍມາ ໄດ້ໂຈມຕີພາກກາງແລະພາກຕາເວັນຕົກຂອງກູບາ, ພາໃຫ້ຢ່າງໜ້ອຍ 10 ຄົນເສຍຊີວິດ, ຝົນຕົກໜັກເຮັດໃຫ້ເຮືອນຈຳນວນຫຼວງຫຼາຍພັງທະລາຍແລະຖືກຈົມ, ສິ່ງກໍ່ສ້າງໄຟຟ້າແລະການທ່ອງທ່ຽວໄດ້ປະສົບຄວາມເສຍຫາຍຢ່າງໜັກໜ່ວງ, ປະຊາຊົນຫຼາຍກວ່າລ້ານຄົນຖືກຍ້າຍໄປບ່ອນອື່ນ. ປັດຈຸບັນ, ແຂວງສ່ວນຫຼາຍຂອງກູບາໄດ້ເຂົ້າໃນໄລຍະຟື້ນຟູຄືນໃໝ່ຫຼັງປະສົບໄພແລ້ວ.