ວັນທີ 16 ກັນຍານີ້, ໃນເວລາພົບປະກັບທ່ານຊິກຟຣິດ ບຣັກ ປະທານສະພາຜູ້ແທນລາຊະດອນແບນຊິກຢູ່ນະຄອນເດເຮລານ, ທ່ານຮາຊັນ ຣູຮານີ(Hassan rouhani), ປະທານາທິບໍດີອີຣານກ່າວວ່າ, ຫວັງໃຫ້ສະຫະພາບເອີລົບຈົ່ງຮຽກຮ້ອງໃຫ້ອາເມລິກາເຄົາລົບສັນຍາຮອບດ້ານກ່ຽວກັບບັນຫານິວເຄຼຍອີຣານ.
ໂທລະພາບຂ່າວ ຂອງຝ່າຍທາງການອີຣານ ໄດ້ນຳເອົາຄວາມເວົ້າຂອງທ່ານ ຣູຮານີ ມາລາຍງານວ່າ: "ກ່ອນອື່ນ, ພວກຂ້າພະເຈົ້າຫວັງວ່າ ສະຫະພາບເອີລົບສາມາດປະຕິບັດຕາມສັນຍາຮອບດ້ານກ່ຽວກັບບັນຫານິວເຄຼຍອີຣານຢ່າງແທ້ຈິງ. ແລະພວກຂ້າພະເຈົ້າກໍ່ຫວັງວ່າ ສະຫະພາບເອີລົບສາມາດສົ່ງສັນຍານແຮງກ້າໃຫ້ອາເມລິກາ, ເພື່ອສ້າງແຮງກົດດັນອາເມລິກາ, ຮຽກຮ້ອງໃຫ້ອາເມລິກາ ປະຕິບັດຕາມສັນຍາຮອບດ້ານກ່ຽວກັບບັນຫານິວເຄຼຍອີຣານ".
ທ່ານບຣັກກ່າວວ່າ, ສັນຍາຮອບດ້ານກ່ຽວກັບບັນຫານິວເຄຼຍອີຣານມີຄວາມໝາຍສຳຄັນທີ່ສຸດຕໍ່ສະຫະພາບເອີລົບແລະອີຣານ, ແບນຊິກຈະທຳຄວາມພະຍາຍາມສຸດຂີດເພື່ອຊຸກຍູ້ໃຫ້ສະຫະພາບເອີລົບປົກປັກຮັກສາສັນຍາສະບັບນີ້.
ເດືອນກໍລະກົດປີ 2015, ອີຣານກັບ 6 ປະເທດທີ່ກ່ຽວຂ້ອງກັບບັນຫານິວເຄຼຍອີຣານ (ອາເມລິກາ, ອັງກິດ, ຝຣັ່ງ, ຣັດເຊຍ, ຈີນແລະເຢຍລະມານ) ໄດ້ເຊັນສັນຍາຮອບດ້ານກ່ຽວກັບບັນຫານິວເຄຼຍອີຣານ. ຕາມສັນຍາ, ອີຣານໃຫ້ຄຳໝັ້ນສັນຍາວ່າ ຈະຈຳກັດແຜນການນິວເຄຼຍຂອງຕົນ, ປະຊາຄົມໂລກຈະຍົກເລີກການຂວ້ຳບາດຕໍ່ອີຣານ, ອົງການພະລັງງານປະລະມານູສາກົນຮັບຜິດຊອບການຕິດຕາມກວດກາສະພາບປະຕິບັດສັນຍາຂອງອີຣານ.
ນັບແຕ່ທ່ານໂດນັນ ທຣຳ ດຳລົງຕຳແໜ່ງປະທານາທິບໍດີອາເມລິກາໃນເດືອນມັງກອນປີນີ້ເປັນຕົ້ນມາ, ລັດຖະບານອາເມລິກາໄດ້ໃຊ້ແຮງກົດດັນຕໍ່ອີຣານຢ່າງຕໍ່ເນື່ອງໂດຍອ້າງວ່າ ອີຣານພັດທະນາລູກສອນໄຟນຳວິຖີແລະວາງມາດຕະການຂວ້ຳບາດຫຼາຍຢ່າງ. ທ່ານທຣຳຍັງກ່າວວ່າ ຈະຖອນອອກຈາກສັນຍາ ຫຼື ຍຸບສັນຍາ, ແລ້ວຈັດການເຈລະຈາຄືນໃໝ່.
ອີຣານກ່າວເນັ້ນຫຼາຍເທື່ອວ່າ, ຈະບໍ່ດຳເນີນການເຈລະຈາຄືນໃໝ່ກ່ຽວກັບສັນຍາທີ່ກ່ຽວຂ້ອງ, ແລະຕິຕຽນວ່າການກະທຳຂອງອາເມລິກາໄດ້ຝ່າຝືນສັນຍາທີ່ກ່ຽວຂ້ອງ.