ພະແນກກວດກາແລະກັກກັນພະຍາດແຂວງຢຸນນານ ສປ ຈີນເປີດເຜີຍໃນວັນທີ 17 ກັນຍານີ້ວ່າ: ພະແນກຕົນແລະພະແນກສາທາລະນະສຸກແຂວງຫຼວງນ້ຳທາ ສປປ ລາວໄດ້ເຊັນບົດບັນທຶກວ່າດ້ວຍການຮ່ວມມືກັກກັນແລະກວດກາສຸຂະພາບຢູ່ເຂດຊາຍແດນໃນເມືອງຄຸນມິງໂດຍສອງຝ່າຍໄດ້ບັນລຸຄວາມເປັນເອກະພາບກັນຫຼາຍດ້ານເປັນຕົ້ນ ສ້າງຕັ້ງກົນໄກການພົບປະເຮັດວຽກເປັນປະຈຳ, ແລກປ່ຽນຂໍ້ມູນຂ່າວສານສະພາບການແຜ່ລະບາດພະຍາດໃຫ້ກັນຊາບ,ເພີ່ມການຮ່ວມມືຕິດຕາມກວດກາພະຍາດຕິດຕໍ່ຢູ່ດ່ານຊາຍແດນ, ຮ່ວມກັນສຶກສາຄົ້ນຄວ້າວິຊາການໃນຫົວຂໍ້ສະເພາະ, ຝຶກອົບຮົມແລະຍົກລະດັບວິຊາການໃຫ້ພະນັກງານລາວພ້ອມສະໜັບສະໜູນເຕັກນິກວິຊາການໃຫ້ແກ່ລາວແລະອື່ນໆ.
ທ່ານທຽນຈ້ວງ ຫົວໜ້າພະແນກກວດກາແລະກັກກັນພະຍາດແຂວງຢຸນນານຢືນຢັນວ່າ ການເຊັນບົດບັນທຶກດັ່ງກ່າວຈະມີບົດບາດໃນການເພີ່ມທະວີການຮ່ວມມືກວດກາແລະກັກກັນພະຍາດລະຫວ່າງສອງຝ່າຍ, ປ້ອງກັນບໍ່ໃຫ້ພະຍາດແຜ່ລະບາດຂ້າມຊາຍແດນແລະປົກປັກຮັກສາສຸຂະພາບຂອງປະຊາຊົນສອງຊາດ.
ການທີ່ສອງແຂວງດັ່ງກ່າວເຊັນບົດບັນທຶກຮ່ວມມືເທື່ອນີ້ເປັນມາດຕະການສຳຄັນຂອງພະແນກກວດກາແລະກັກກັນພະຍາດແຂວງຢຸນນານຈັດຕັ້ງປະຕິບັດສັນຍາວ່າດ້ວຍການກັກກັນແລະກວດກາສຸຂະພາບຢູ່ເຂດຊາຍແດນຈີນ-ລາວ ແລະເນື້ອໃນຈິດໃຈຂອງກອງປະຊຸມການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງທີ່ເມືອງຊ່ານຢ້າ ທັງເປັນມາດຕະການສຳຄັນເພື່ອກໍ່ສ້າງສູນກາງບໍລິການແຂວງຢຸນນານທີ່ຫັນໜ້າສູ່ອາຊີໃຕ້ແລະອາຊີຕາເວັນອອກສຽງໃຕ້.