ກອງປະຊຸມສະມັດຊາໃຫຍ່ອົງການສະຫະປະຊາຊາດຊຸດທີ 72 ໄດ້ເລີ່ມເປີດການອະພິປາຍທົ່ວໄປນັບແຕ່ວັນທີ 19 ກັນຍານີ້ເປັນຕົ້ນໄປ ໂດຍຜູ້ນຳ ຫຼື ຜູ້ແທນຂັ້ນສູງຂອງປະເທດຕ່າງໆຈະຮ່ວມກັນຫາລືມາດຕະການຮັບມືກັບສິ່ງທ້າທາຍທີ່ໜັກໜ່ວງ.
ທັງນີ້ ບັນຫານິວເຄລຍຢູ່ແຫຼມເກົາຫຼີ ຈະເປັນໜຶ່ງໃນບັນຫາຕ່າງໆທີ່ໜ້າສົນໃຈທີ່ສຸດໃນກອງປະຊຸມດັ່ງກ່າວ ລວມທັງສະຖານະການຢູ່ມຽນມາ ແລະ ຈຸດທີ່ໜ້າສົນໃຈອີກຈຸດໜຶ່ງຂອງກອງປະຊຸມດັ່ງກ່າວ ກໍຄື ບັນຫາການປ່ຽນແປງດິນຟ້າອາກາດ. ນອກຈາກຫົວຂໍ້ດັ່ງກ່າວແລ້ວ, ບັນດາຝ່າຍທີ່ເຂົ້າຮ່ວມກອງປະຊຸມຍັງຈະສະເໜີທັດສະນະຂອງຕົນກ່ຽວກັບການປະຕິຮູບການເຄື່ອນໄຫວຮັກສາສັນຕິພາບ ແລະບັນຫາສຳຄັນອື່ນໆອີກ.
ທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນ ກໍຈະນຳຄະນະຜູ້ແທນປະເທດຕົນເຂົ້າຮ່ວມກອງປະຊຸມອະພິປາຍທົ່ວໄປຂອງສະມັດຊາໃຫຍ່ອົງການສະຫະປະຊາຊາດເທື່ອນີ້ ໂດຍຈະສະເໜີຫຼັກໝັ້ນ ແລະ ເຈຕະນາລົມຂອງຈີນຕໍ່ສະຖານະການສາກົນໃນປັດຈຸບັນ ແລະ ບັນຫາສຳຄັນສາກົນກໍຄືພາກພື້ນຢ່າງຮອບດ້ານ ທັງສະແດງໃຫ້ເຫັນເຖິງຄວາມຕັດສິນໃຈອັນເດັດດ່ຽວຂອງຈີນໃນການພ້ອມກັບບັນດາປະເທດສະມາຊິກອົງການສະຫະປະຊາຊາດປົກປັກຮັກສາສັນຕິພາບ ແລະ ສະຖຽນລະພາບຂອງໂລກ ກໍຄືການຊຸກຍູ້ການພັດທະນາແລະຄວາມຈະເລີນຮຸ່ງເຮືອງໃນໂລກ.