ທ່ານປຣະຍຸດຈັນໂອຊາ ນາຍົກລັດຖະມົນຕີໄທຢືນຢັນໃນງານວາງສະແດງ "Digital TaiLand Big Bang 2017 ທີ່ຈັດຂຶ້ນໃນວັນທີ 21 ກັນຍານີ້ວ່າ: ໄທຕ້ອງບັນລຸເປົ້າໝາຍເຮັດໃຫ້ລະບົບອິນເຕີເນັດປົກຄຸມເຂດຊົນນະບົດທົ່ວປະເທດໃນທ້າຍປີ 2018 ເພື່ອບັນລຸການຫັນເປັນສັງຄົມດີຈີຕອນໂດຍໄວເທົ່າທີ່ຈະໄວໄດ້.
ທ່ານປຣະຍຸດຢືນຢັນວ່າ ປັດຈຸບັນ, ໄທມີ 4 ໝື່ນບ້ານໄດ້ເຊື່ອມຕໍ່ເຂົ້າລະບົບອິນເຕີເນັດແລ້ວ, ຮອດທ້າຍປີ 2018 ຕ້ອງບັນລຸໃຫ້ 7 ໝື່ນກວ່າບ້ານໃນທົ່ວປະເທດເຊື່ອມຕໍ່ເຂົ້າລະບົບອິນເຕີເນັດແລະແຕ່ລະບ້ານຕ້ອງມີຈຸດwifiໂດຍບໍ່ເກັບຄ່າ.
ທ່ານປຣະຍຸດກ່າວຕື່ມວ່າ ອິນເຕີເນັດດ້ານໜຶ່ງຈະສາມາດເຮັດໃຫ້ປະຊາຊົນໃນຊົນນະບົດໄດ້ຮັບຂໍ້ມູນຂ່າວສານໂດຍສະເພາະຂໍ້ມູນຂ່າວສານດ້ານເຕັກນິກກະສິກຳໃຫ້ຫຼາຍກວ່າເກົ່າ, ອີກດ້ານໜຶ່ງ,ການທີ່ລະບົບອິນເຕີເນັດປົກຄຸມທົ່ວເຂດຊົນນະບົດກໍຈະສາມາດສົ່ງເສີມການພັດທະນາການຄ້າເອເລັກໂຕຣນິກ,ເຮັດໃຫ້ປະຊາຊົນມີລາຍໄດ້ສູງຂຶ້ນ ຂະນະດຽວກັນກໍຫວັງຈະເຮັດໃຫ້ຜະລິດຕະພັນຂອງໄທກ້າວໄປສູ່ທົ່ວໂລກ.
ໃນງານວາງສະແດງດັ່ງກ່າວ, ທ່ານປຣະຍຸດຍັງໄດ້ສຳຜັດກັບການຂີ່ລົດຖີບສາທາລະນະofoຂອງຈີນ ທັງໄດ້ຢ້ຽມຊົມຮ້ານວາງສະແດງຂອງບໍລິສັດຈີນເປັນຕົ້ນບໍລິສັດຮວາເຫວີຍ,ຂະນະທີ່ບໍລິສັດຮວາເຫວີຍໄດ້ສະເໜີແຜນການຫັນເປັນດີຈີຕອນຂອງ10ຂະແໜງການໃຫຍ່ເຊັ່ນຕົວເມືອງສະມາດແລະອື່ນໆເພື່ອການພັດທະນາຂອງໄທ.
 |
