ວັນທີ 23 ກັນຍານີ້ ກະຊວງປ້ອງກັນປະເທດອາເມລິກາກ່າວວ່າ, ໃນວັນດັ່ງກ່າວ ຍົນຖິ້ມລະເບີດຍຸດທະສາດຫຼາຍລຳຂອງປະເທດຕົນໄດ້ບິນຜ່ານເຂດນ້ຳທາງພາກຕາເວັນອອກຂອງສປປເກົາຫຼີ ໂດຍມີການປ້ອງກັນການບິນຈາກຍົນຮົບ, ບິນໄປຮອດສົ້ມເໜືອສຸດຂອງເຂດປອດທະຫານລະຫວ່າງສ.ເກົາຫຼີແລະສປປເກົາຫຼີ ທີ່ຍົນຮົບອາເມລິກາບິນຮອດນັບແຕ່ສະຕະວັດນີ້ເປັນຕົ້ນມາ.
ຫວ່າງມໍ່ໆມານີ້ ລັດຖະບານອາເມລິກາໄດ້ໃຊ້ທ່າທີແຂງແຮງຕໍ່ສປປເກົາຫຼີ. ວັນທີ 19 ກັນຍານີ້ ທ່ານໂດນັນ ທຣຳປະທານາທິບໍດີອາເມລິກາໄດ້ກ່າວຖ້ອຍຄວາມທີ່ຈະທຳລາຍສປປເກົາຫຼີຢ່າງເຖິງຖອງໃນກອງປະຊຸມອະພິປາຍທົ່ວໄປຂອງສະມັດຊາໃຫຍ່ອົງການສະຫະປະຊາຊາດ, ຈາກນັ້ນກໍໃຊ້ຄວາມກົດດັນຕໍ່ສປປເກົາຫຼີຕື່ມອີກໃນວັນທີ 21 , ໂດຍປະກາດໃຊ້ມາດຕະການຂວ້ຳບາດສປປເກົາຫຼີຢ່າງເຂັ້ມງວດຮອບໃໝ່.
ເມື່ອປະເຊີນກັບຄວາມກົດດັນຈາກອາເມລິກາ, ວັນທີ 22 ກັນຍານີ້ ຂ່າວສານສູນກາງສປປເກົາຫຼີໄດ້ອ້າງຕາມຖະແຫຼງການຂອງທ່ານກິມເຈິງອຸນ ຜູ້ນຳສູງສຸດຂອງສປປເກົາຫຼີໂດຍລາຍງານວ່າ, ທ່ານທຣຳກ່າວຖ້ອຍຄວາມຢຽບຫຍາມປະເທດຕົນແລະທ່ານກິມເຈິງອຸນຕໍ່ທົ່ວໂລກ, ແລະທ່ານກິມເຈິງອຸນກຳລັງຄຶດວ່າຈະໃຊ້ມາດຕະການຕອບໂຕ້ຄືນຢ່າງແຂງແຮງກວ່າເກົ່າແນວໃດຕໍ່ອາເມລິກາ.
 |
