ທ່ານລູ້ຄ່າງ ໂຄສົກກະຊວງການຕ່າງປະເທດຈີນ ກ່າວໃນພິທີຖະແຫຼງຂ່າວທີ່ຈັດຂຶ້ນຢູ່ນະຄອນຫຼວງປັກກິ່ງໃນວັນທີ 25 ກັນຍານີ້ວ່າ: ມາຮອດປັດຈຸບັນ ມີ 74 ປະເທດແລະອົງການຈັດຕັ້ງສາກົນ ໄດ້ລົງນາມຮ່ວມມື "ໜຶ່ງແລວທາງໜຶ່ງເສັ້ນທາງ" ກັບຈີນແລ້ວ ເຊິ່ງສະແດງໃຫ້ເຫັນວ່າ ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ນັບມື້ໄດ້ຮັບການຕອບຮັບເປັນຢ່າງດີຫຼາຍຂຶນ ແລະ ໄດ້ຮັບການສະໜັບສະໜູນຢ່າງກວ້າງຂວາງ.
ກ່ອນໜ້ານີ້, ທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນ ໄດ້ຕອບຄຳຖາມທີ່ກ່ຽວຂ້ອງໃນໂອກາດເຂົ້າຮ່ວມກອງປະຊຸມອະພິປາຍທົ່ວໄປຂອງສະມັດຊາໃຫຍ່ອົງການສະຫະປະຊາຊາດວ່າ: ໃນຂະບວນການສ້າງ "ໜຶ່ງແລວທາງໜຶ່ງເສັ້ນທາງ", ຈີນຍຶດໝັ້ນທັດສະນະ "ປຶກສາຫາລືຮ່ວມກັນ, ກໍ່ສ້າງຮ່ວມກັນ ແລະ ຊົມໃຊ້ຮ່ວມກັນ" ຢ່າງສະເໝີຕົ້ນສະເໝີປາຍ ແລະຮ່ວມກັບປະເທດທີ່ຢູ່ລຽບຕາມໜຶ່ງແລວທາງໜຶ່ງເສັ້ນທາງສຸມໃສ່ຊຸກຍູ້ການສ້າງລະບົບກົດລະບຽບເສດຖະກິດ-ການຄ້າ-ການລົງທຶນສາກົນແບບເປັນທຳ, ສົມເຫດສົມຜົນ ແລະ ໂປ່ງໃສ ທັງກ່າວດ້ວຍຄວາມເຊື່ອໝັ້ນວ່າການຮ່ວມມື "ໜຶ່ງແລວທາງໜຶ່ງເສັ້ນທາງ" ຈະສຸມພະລັງຊຸກດັນໃໝ່ເພື່ອການພັດທະນາເສດຖະກິດຂອງພາກພື້ນ ກໍຄືຂອງໂລກ ແລະຈະເປັນຜົນດີຕໍ່ບັນດາປະເທດໃນໂລກເພື່ອບັນລຸເປົ້າໝາຍການພັດທະນາຮ່ວມກັນ ແລະ ຈະເລີນຮຸ່ງເຮືອງຮ່ວມກັນ.
