ລະຫວ່າງວັນທີ 25-28 ກັນຍານີ້, ຖ້າຜູ້ນຳໃຊ້ເປີດນຳໃຊ້ລະບົບວີແຊັດ ກໍຈະເຫັນພາບທົ່ວປະເທດທີ່ຖ່າຍໂດຍດາວທຽມ "ເຟິ່ງຢິນ 4" ເຊິ່ງເປັນດາວທຽມອຸຕຸນິຍົມວົງໂຄຈອນທຽບສະຖິດກັບຈັງຫວະໝູນປິ່ນຂອງໜ່ວຍໂລກຮຸ່ນໃໝ່ ແລະເປັນສັນຍານການປ່ຽນນຳໃຊ້ໜ້າເປີດລະບົບວີແຊັດເທື່ອທຳອິດໃນຮອບ 6 ປີຜ່ານມາ ໂດຍຮູບພາບໜ່ວຍໂລກທີ່ມີມຸມມອງຈາກເທິງອາກາດແຜ່ນດິນໃຫຍ່ອາຟຣິກາ ປ່ຽນເປັນມຸມມອງຈາກເທິງອາກາດປະເທດຊາດ. ເປັນຫຍັງລະບົບວີແຊັດຈຶ່ງປ່ຽນນຳໃຊ້ຮູບໃໝ່? ກໍຍ້ອນວ່າ ວັນທີ 25 ກັນຍານີ້, ດາວທຽມ "ເຟິ່ງຢິນ 4" ໄດ້ມອບນຳໃຊ້ຢ່າງເປັນທາງການ, ຂະນະທີ່ດາວທຽມໜ່ວຍດັ່ງກ່າວມີຊື່ເຕັມ ຄື ດາວທຽມ "ເຟິ່ງຢິນ 4" ໜ່ວຍ A, ໄດ້ຖືກຍິງເຂົ້າສູ່ວົງໂຄຈອນຈາກຖານສົ່ງດາວທຽມຊີຊ່າງ ສປ ຈີນໃນວັນທີ 11 ທັນວາປີ 2016 ຢ່າງສຳເລັດຜົນ ເຊິ່ງມີຄວາມໝາຍສຳຄັນຫຼາຍຕໍ່ການຮັບປະກັນໃຫ້ຈີນສາມາດຕິດຕາມສັງເກດອຸຕຸນິຍົມຈາກວົງໂຄຈອນທຽບສະຖິດຕາມຈັງຫວະໝູນປິ່ນຂອງໜ່ວຍໂລກຢ່າງຕໍ່ເນື່ອງ, ເຊື່ອຖືໄດ້ ແລະ ໝັ້ນທ່ຽງ ພ້ອມທັງຍົກສູງຖານະແລະອິດທິພົນດ້ານພາລະກິດການບິນອະວະກາດ ແລະ ອຸຕຸນິຍົມ ຂອງຈີນໃນສາກົນອີກດ້ວຍ.