ທ່ານ ຢູເຈີ້ງເຊິ່ງ ປະທານສະພາປຶກສາການເມືອງປະຊາຊົນແຫ່ງຊາດຈີນ ໄດ້ພົບປະກັບທ່ານນາງ ເຈືອງທິຫງອກແອງ ຮອງປະທານຄະນະກຳມະການແນວໂຮມປະເທດຊາດຫວຽດນາມຢູ່ນະຄອນຫຼວງປັກກິ່ງໃນວັນທີ 26 ກັນຍານີ້.
ໂອກາດດັ່ງກ່າວ, ທ່ານ ຢູເຈີ້ງເຊິ່ງ ກ່າວວ່າ, ຍາມໃດ ຈີນກໍໃຫ້ຄວາມສຳຄັນຕໍ່ສາຍພົວພັນກັບຫວຽດນາມ ໂດຍເຫັນໄດ້ນັບແຕ່ຕົ້ນປີນີ້ເປັນຕົ້ນມາ, ຜູ້ນຳສອງປະເທດໄດ້ພົບປະກັນຫຼາຍເທື່ອ ແລະໄດ້ກ້າວສູ່ຄວາມເປັນເອກະພາບກັນທີ່ສຳຄັນກ່ຽວກັບການກຳແໜ້ນສາຍພົວພັນມິດຕະພາບມະຫາພາກແລະລົງເລິກການຮ່ວມມືຮອບດ້ານລະຫວ່າງສອງຝ່າຍ ເຊິ່ງເປັນການຊີ້ທິດຢ່າງຈະແຈ້ງໃຫ້ແກ່ການເສີມຂະຫຍາຍສາຍພົວພັນສອງຝ່າຍໃນໄລຍະຕໍ່ໜ້າ. ແນວໃດກໍດີ, ຈີນຍິນດີພະຍາຍາມຮ່ວມກັບຫວຽດນາມ ເພີ່ມທະວີການຕິດຕໍ່ພົວພັນຍຸດທະສາດ, ລົງເລິກການຮ່ວມມືແບບຕ່າງຝ່າຍຕ່າງມີຜົນປະໂຫຍດ, ແກ້ໄຂຄວາມຂັດແຍ້ງກັນຢ່າງເໝາະສົມ ແລະຊຸກຍູ້ສາຍພົວພັນສອງປະເທດໃຫ້ຂະຫຍາຍຕົວຢ່າງປອດໃສແລະໜັກແໜ້ນ. ຂະນະດຽວກັນ, ສະພາປຶກສາການເມືອງປະຊາຊົນແຫ່ງຊາດຈີນ ກໍຍິນດີເພີ່ມທະວີການພົວພັນກັບແນວໂຮມປະເທດຊາດຫວຽດນາມ ເພື່ອລົງເລິກແລກປ່ຽນບົດຮຽນໃນການເຂົ້າຮ່ວມການປົກຄອງແລະຫາລືວຽກງານການເມືອງ ແລະ ເສີມຂະຫຍາຍບົດບາດທີ່ດີ ເພື່ອຊຸກຍູ້ສາຍພົວພັນມິດຕະພາບ, ການຮ່ວມມື ແລະ ການແລກປ່ຽນລະຫວ່າງປະຊາຊົນສອງປະເທດ.
ທ່ານນາງ ເຈືອງທິຫງອກແອງ ກ່າວວ່າ, ອົງການຕົນຍິນດີເພີ່ມທະວີສາຍພົວພັນມິດຕະພາບແລະການຮ່ວມມືກັບສະພາປຶກສາການເມືອງປະຊາຊົນແຫ່ງຊາດຈີນ ເພື່ອຊຸກຍູ້ສາຍພົວພັນຄູ່ຮ່ວມຍຸດທະສາດຮອບດ້ານສອງປະເທດໃຫ້ຂະຫຍາຍຕົວກ້າວສໜ້າຢ່າງບໍ່ຢຸດຢັ້ງ.