ທ່ານ ວາງຊີຊ່ານ ກຳມະການປະຈຳກົມການເມືອງ, ປະທານຄະນະກວດກາສູນກາງພັກກອມມູນິດຈີນ ໄດ້ພົບປະກັບທ່ານນາງ ເມັນຊຳອອັນ ກຳມະການປະຈຳສູນກາງພັກປະຊາຊົນກຳປູເຈຍ, ຮອງນາຍົກລັດຖະມົນຕີ ທັງເປັນລັດຖະມົນຕີກະຊວງປະສານງານສະພາແລະກວດກາກຳປູເຈຍ ຢູ່ທຳນຽບຈົ່ງນານໄຫນະຄອນຫຼວງປັກກິ່ງໃນວັນທີ 26 ກັນຍານີ້.
ໂອກາດດັ່ງກ່າວ, ທ່ານ ວາງຊີຊ່ານ ກ່າວວ່າ, ໄລຍະ 5 ປີນັບແຕ່ກອງປະຊຸມໃຫຍ່ພັກກອມມູນິດຈີນຄັ້ງທີ 18 ເປັນຕົ້ນມາ ເປັນໄລຍະທີ່ປະຊາຊົນຈີນທົ່ວປະເທດບຸກບືນກ້າວໜ້າ ພາຍໃຕ້ການນຳພາຂອງສູນກາງພັກກອມມູນິດຈີນ ໂດຍແມ່ນທ່ານ ສີຈິ້ນຜິງ ເປັນແກນກາງ ເຊິ່ງໃນໄລຍະດັ່ງກ່າວ, ພາລະກິດຕ່າງໆຂອງພັກແລະລັດ ໄດ້ມີການປ່ຽນແປງຄັ້ງປະຫວັດສາດ ແລະ ໄດ້ຮັບຜົນງານຢ່າງສະຫງ່າຜ່າເຜີຍ, ຂະນະດຽວກັນ, ປະຊາຊົນຈີນ ຍິ່ງເຊື່ອໝັ້ນວ່າ, ຕ້ອງໄດ້ເດັດດ່ຽວສືບຕໍ່ການນຳພາຂອງພັກກອມມູນິດຈີນ ແລະ ຕ້ອງເດີນຕາມເສັ້ນທາງສັງຄົມນິຍົມທີ່ມີສີສັນພິເສດຂອງຈີນ.
ທ່ານນາງ ເມັນຊຳອອັນ ໄດ້ຊົມເຊີຍຜົນງານໃຫຍ່ຫຼວງໃນພາລະກິດສ້າງສັງຄົມນິຍົມ ແລະ ການກໍ່ສ້າງພັກຂອງຈີນ ແລະຫວັງເພີ່ມທະວີການແລກປ່ຽນ ແລະ ການຮ່ວມມືໃນຂົງເຂດກວດກາ ແລະ ກວດສອບ, ທັງສືບທອດແລະເສີມຂະຫຍາຍມິດຕະພາບທີ່ເປັນມູນເຊື້ອລະຫວ່າງກຳປູເຈຍແລະຈີນ.