ທ່ານ ຊູໂຕໂປ ໂຄສົກອົງການຕ້ານໄພອິນໂດເນເຊຍ ກ່າວໃນວັນທີ 26 ກັນຍານີ້ວ່າ, ຫວ່າງມໍ່ໆນີ້, ພູໄຟອາກູງຢູ່ເກາະບາລີປະເທດຕົນ ໄດ້ປະທຸຢ່າງຮຸນແຮງ ເຊິ່ງມີຄວາມເປັນໄປໄດ້ທີ່ຈະລະເບີດເພີ່ມຂຶ້ນ. ຈາກນີ້ ຈຶ່ງໄດ້ຍົກຍ້າຍປະຊາຊົນຫຼາຍກວ່າ 57.000 ຄົນໄປຢູ່ບ່ອນປອດໄພຢ່າງສຸກເສີນ.
ທ່ານ ຊູໂຕໂປ ກ່າວໃນການຖະແຫຼງຂ່າວມື້ດຽວກັນວ່າ, ປັດຈຸບັນ, ຍັງບໍ່ຮູ້ເວລາລະອຽດການລະເບີດຂອງພູໄຟ ແລະ ການປະທຸຂອງພູໄຟດັ່ງກ່າວ ກໍບໍ່ໄດ້ສ້າງຄວາມສ່ຽງໂດຍກົງຕໍ່ນັກທ່ອງທ່ຽວຢູ່ນອກເຂດຍົກຍ້າຍ.
ທ່ານ ຊູໂຕໂປ ຍັງຊີ້ໃຫ້ເຫັນວ່າ, ເຂດຍົກຍ້າຍ ໝາຍເຖິງເຂດທີ່ຫ່າງຈາກປາກພູໄຟໃນວົງລັດສະໝີ 9-12 ກິໂລແມັດ, ປະຊາຊົນໃນເຂດນີ້ ໄດ້ຖືກຍົກຍ້າຍໄປບ່ອນປອດໄພຊົ່ວຄາວຕ່າງໆ ເປັນຕົ້ນ: ສະໜາມກິລາ, ເດີ່ນບ້ານ ແລະອື່ນໆ.