ປັດຈຸບັນ, ບໍລິສັດການບິນໄຊນາເຊົາເທິນມີເຮືອບິນຫຼາຍກວ່າ 700 ລຳ ແລະເປັນບໍລິສັດໃຫຍ່ກວ່າໝູ່ໃນອາຊີແລະເປັນທີ 4 ຂອງໂລກ. ຜ່ານມາໄດ້ເປີດເສັ້ນທາງການບິນກັບຫຼາຍປະເທດແລະສຳລັບ ສປປ ລາວແລ້ວ,ບໍລິສັດດັ່ງກ່າວໄດ້ເປີດເສັ້ນທາງບິນກວາງໂຈ່ວ - ວຽງຈັນຢ່າງເປັນທາງການໃນວັນທີ 27 ກັນຍານີ້ດ້ວຍຖ້ຽວບິນ CZ 6091/6092 ແລະບິນ 3 ມື້ຕໍ່ອາທິດຄືວັນພຸດ, ວັນສຸກແລະວັນອາທິດ. ໂດຍຕາມຕາຕະລາງການບິນຈະອອກເດີນທາງຈາກກວາງໂຈ່ວເວລາ 16:30 ໂມງ ເຖິງນະຄອນຫຼວງ 18:10 ໂມງ ແລະ ນະຄອນຫຼວງວຽງຈັນ 19:10 ໂມງ ເຖິງກວາງໂຈ່ວເວລາ 22:25 ໂມງ.
ການເປີດເສັ້ນທາງການບິນກວາງໂຈ່ວ-ວຽງຈັນຂອງສາຍການບິນໄຊນາເຊົາເທິນເທື່ອນີ້ເປັນໜຶ່ງໃນໂຄງການສຳຄັນໃນຍຸດທະສາດໜຶ່ງແລວທາງໜຶ່ງເສັ້ນທາງ ເຊິ່ງອຳນວຍຄວາມສະດວກໃນການໄປມາຂອງປະຊາຊົນສອງຊາດລາວຈີນກໍຄືການພົວພັນການຄ້າ,ການລົງທຶນ ແລະການແລກປ່ຽນວັດທະນະທຳເຊິ່ງກັນແລະກັນໃຫ້ວ່ອງໄວ ແລະ ໄດ້ຮັບການບໍລິການທີ່ມີຄຸນນະພາບ, ສ້າງເປັນຂົວຕໍ່ແຫ່ງມິດຕະພາບຂອງສອງປະເທດ.
ຫຼັງຈາກເປີດເສັ້ນທາງການບິນດັ່ງກ່າວນີ້ແລ້ວ, ຜູ້ໂດຍສານຈາກປະເທດລາວຈະໄດ້ຮັບການບໍລິການທີ່ວ່ອງໄວ, ທັນສະໄໝໃນການປ່ຽນເຮືອບິນເພື່ອເດີນທາງຕໍ່ໄປແຕ່ລະເຂດແຂວງຂອງຈີນ ແລະທະວີບເອີລົບ, ອາເມລິກາ, ໂອຊີອານີ ແລະ ຍີ່ປຸ່ນ, ສ.ເກົາຫຼີ ອື່ນໆ. ຂະນະທີ່ເຄື່ອງຂອງຜູ້ໂດຍສານທີ່ປ່ຽນເຮືອຢູ່ກວາງໂຈ່ວກໍສາມາດສົ່ງໄປເຖິງປະເທດປາຍທາງໄດ້ໂດຍບໍ່ຈຳເປັນຖ້າຮັບເອົາຫີບເຄື່ອງຢູ່ລະຫວ່າງທາງ.
