ກອງປະຊຸມລັດຖະມົນຕີພະລັງງານອາຊຽນຄັ້ງທີ 35 ໄດ້ຈັດຂຶ້ນຢູ່ນະຄອນຫຼວງມະນີລາປະເທດຟີລິບປີນໃນວັນທີ 27 ກັນຍານີ້.
ທ່ານອານຟົນໂຊ ກູຊິ ລັດຖະມົນຕີກະຊວງພະລັງງານຟີລິບປີນກ່າວໃນພິທີໄຂປະຊຸມວ່າ, ປັດຈຸບັນສະພາບພະລັງງານຂອງໂລກໄດ້ມີການປ່ຽນແປງໃຫຍ່, ພະລັງງານທົ່ວໄປກຳລັງຫັນເປັນພະລັງງານໃໝ່ຢ່າງບໍ່ຢຸດຢັ້ງ. ແລະໃນຕໍ່ໜ້າ, ຈະເຮັດແນວໃດເຮັດໃຫ້ຂະແໜງການພະລັງງານໃໝ່ຫຼຸດພົ້ນອອກຈາກການອຸດໜູນຈາກລັດຖະບານເພື່ອກ້າວມາສູ່ການດຶງດູດການລົງທຶນ, ແລະກາຍເປັນຂະແໜງການທຸລະກິດທີ່ມີການພັດທະນາຢ່າງຕໍ່ເນື່ອງແມ່ນການທ້າທາຍທີ່ປະເທດຕ່າງໆໃນໂລກຜະເຊີນໜ້າ.
ທ່ານກູຊິກ່າວວ່າ, ໃນຂົງເຂດພະລັງງານທົ່ວໄປ, ທະວີບອາຊີມີຄວາມຕ້ອງການອາຍແກັສທຳມະຊາດນັບມື້ນັບຫຼາຍຂຶ້ນ, ໄດ້ຫັນຈາກເຂດສົ່ງອອກອາຍແກັສທຳມະຊາດເປັນເຂດນຳເຂົ້າ; ອາເມລິກາກາຍເປັນປະເທດໃຫຍ່ທີ່ສົ່ງອອກອາຍແກັສທຳມະຊາດຍ້ອນການປະຕິວັດອາຍແກັສໃນຊັ້ນຫີນເຊິ່ງມັນຈະສົ່ງຜົນສະທ້ອນຢ່າງໃຫຍ່ຫຼວງຕໍ່ຕະຫຼາດພະລັງງານໂລກ. ຈາກນັ້ນ, ບັນດາປະເທດໃນອາຊຽນຄວນຮ່ວມມືແລະປະສານສົມທົບກັນ, ເພື່ອຮັບປະກັນຄວາມໝັ້ນຄົງດ້ານພະລັງງານໃນອະນາຄົດ.