ທ່ານເຣັກ ຕິນເລີຊັນ ລັດຖະມົນຕີກະຊວງການຕ່າງປະເທດອາເມລິກາກ່າວໃນວັນທີ 29 ກັນຍານີ້ວ່າ: ເນື່ອງຈາກສະຖານທູດອາເມລິກາປະຈຳຢູ່ກູບາມີເຈົ້າໜ້າທີ່ 21 ຄົນສຸຂະພາບບໍ່ແຂງແຮງ ຈຶ່ງຕົກລົງສົ່ງເຈົ້າໜ້າທີ່ການທູດທີ່ຕຳແໜ່ງວຽກງານບໍ່ສຳຄັນ ພ້ອມຄອບຄົວກັບຄືນປະເທດ, ແຕ່ກໍຍັງຮັກສາສາຍພົວພັນທາງການທູດກັບກູບາຕາມປົກກະຕິ.
ເຈົ້າໜ້າທີ່ລັດຖະບານອາເມລິກາກ່າວຕໍ່ສື່ມວນຊົນວ່າ: ເນື່ອງຈາກມີເຈົ້າໜ້າທີ່ໃນສະຖານທູດຫຼາຍກວ່າເຄິ່ງຈະກັບຄືນປະເທດ ຈຶ່ງເຮັດໃຫ້ສະຖານທູດຢຸດການອອກວີຊາໄປອາເມລິກາ, ແຕ່ຈະບໍລິການວຽກທີ່ຈຳເປັນເລັ່ງດ່ວນໃຫ້ແກ່ພົນລະເມືອງອາເມລິກາຢູ່ກູບາເທົ່ານັ້ນ. ນອກນີ້ອາເມລິກາຈະຢຸດສົ່ງຄະນະຜູ້ແທນຂອງຕົນເດີນທາງໄປພົບປະສອງຝ່າຍກັບກູບາ, ແຕ່ອາດຈະສືບຕໍ່ຈັດການພົບປະຢູ່ອາເມລິກາ.
ທ່ານກ່າວຕື່ມວ່າ: ປັດຈຸບັນ, ອາເມລິກາຍັງບໍ່ທັນຮຽກຮ້ອງໃຫ້ກູບາຫຼຸດເຈົ້າໜ້າທີ່ສະຖານທູດປະຈຳຢູ່ອາເມລິກາລົງແຕ່ຢ່າງໃດ.
 |
