ໝີແພນດາຈີນ 2 ໂຕທີ່ເປັນຄວາມຫວັງຈາກວົງການຕ່າງໆຂອງອິນໂດເນເຊຍ ໄດ້ເດີນທາງເຖິງນະຄອນຫຼວງຈາກາຕາແລ້ວໃນວັນທີ 28 ກັນຍານີ້ ແລະເປັນການເລີ່ມຕົ້ນດຳລົງຊີວິດຢູ່ອິນໂດເນເຊຍທັງຈະຢູ່ດົນເຖິງ 10 ປີ. ສື່ມວນຊົນອິນໂດເນເຊຍດ່າງກໍລາຍງານຂ່າວວ່າ: ນີ້ແມ່ນຂີດໝາຍທີ່ສະແດງໃຫ້ເຫັນສາຍພົວພັນມິດຕະພາບທີ່ດີລະຫວ່າງຈີນ-ອິນໂດເນເຊຍ ແລະຈະຊຸກຍູ້ສົ່ງເສີມຄວາມຮັກແພງຂອງປະຊາຊົນສອງຊາດ.
ສະຖານີໂທລະພາບເມໂຕຣ ທີ່ມີຊື່ສຽງຂອງອິນໂດເນເຊຍໄດ້ຖ່າຍທອດສົດທຸກຂະບວນຫຼັງໝີແພນດາຢ່ວງບາກຕີນເຂົ້າອິນໂດເນເຊຍໃນວັນທີ 28 ກັນຍານີ້ ທັງບັນລະຍາຍວ່າ ການທີ່ຈີນໃຫ້ອິນໂດຍເນເຊຍຢືມໝີແພນດາ 2 ໂຕນີ້ໄດ້ສະແດງໃຫ້ເຫັນເຖິງສາຍພົວພັນມິດຕະພາບທີ່ດີລະຫວ່າງສອງປະເທດ ທັງຈະເປັນການເພີ່ມທະວີການຮ່ວມມືຂອງສອງຊາດຕື່ມອີກ.
ຂະນະທີ່ໜັງສືພິມພາສາຈີນທີ່ມີຊື່ສຽງທີ່ສຸດຂອງອິນໂດເນເຊຍ "ສາກົນລາຍວັນ" ໄດ້ລາຍງານຂ່າວໝີແພນດາເຂົ້າມາອິນໂດເນເຊຍໃນໜ້າສະເພາະ ເຊິ່ງຊີ້ໃຫ້ເຫັນວ່າ ອິນໂດເນເຊຍໄດ້ຮັບກຽດສູງສົ່ງທີ່ສາມາດຢືມໝີແພນດາຈາກຈີນ, "ໄສເທົາ" ກັບ "ຮູຊົ່ນ"ຈະເປັນສັນຍະລັກໃນການເພີ່ມທະວີສາຍພົວພັນມິດຕະພາບລະຫວ່າງອິນໂດເນເຊຍກັບຈີນ ແລະຊຸກຍູເສົ່ງເສີມຄວາມຣັກແພງສາມັກຄີຂອງປະຊາຊົນສອງຊາດຂຶ້ນເລື້ອຍໆ.