ຕາມຂ່າວ CRI: ວັນທີ 1 ຕຸລານີ້ ແຫຼ່ງຂ່າວຈາກກົມປ່າໄມ້ແຫ່ງຊາດຈີນໃຫ້ຮູ້ວ່າ, ປີ 2016 ຈຳນວນນັກທ່ອງທ່ຽວທີ່ໄປທ່ຽວປ່າທົ່ວປະເທດຈີນບັນລຸເຖິງ 1 ຕື້ 200 ລ້ານກວ່າເທື່ອຄົນ, ໄດ້ສ້າງມູນຄ່າລວມທັງສັງຄົມກາຍ 950 ຕື້ຢວນ, ການທ່ອງທ່ຽວປ່າໄດ້ກາຍເປັນພາກສ່ວນໜຶ່ງຂອງຂະແໜງການປ່າໄມ້ທີ່ມີມູນຄ່າການຜະລິດຫຼາຍກວ່າ 1 ພັນຕື້ຢວນຕໍ່ປີ.
ການທ່ອງທ່ຽວປ່າແມ່ນຊື່ເອີ້ນລວມຂອງການທ່ອງທ່ຽວ ພັກຜ່ອນຢ່ອນອາລົມ ຮັກສາສຸກຂະພາບແລະການສຶກສາດ້ານວັດທະນະທຳທີ່ຖືປ່າໄມ້, ດິນທາມ, ທະເລຊາຍ, ສັດແລະພືດປ່າເປັນພື້ນຖານ.
ທ່ານຈ່າງຢົງລີ້ ຮອງຫົວໜ້າກົມປ່າໄມ້ແຫ່ງຊາດຈີນໃຫ້ຮູ້ວ່າ, ນັບແຕ່ການປະຕິບັດແຜນການ 5 ປີຄັ້ງທີ 12 ເປັນຕົ້ນມາ, ຈຳນວນນັກທ່ອງທ່ຽວປ່າໄມ້ທົ່ວປະເທດຈີນໄດ້ມີຈັງຫວັດເຕີບໂຕ 15% ຕໍ່ປີ, ປັດຈຸບັນ ບ່ອນທ່ອງທ່ຽວປ່າຊະນິດຕ່າງໆໃນທົ່ວປະເທດມີຫຼາຍກວ່າ 9 ພັນແຫ່ງແລ້ວ.
ທ່ານຈ່າງຢົງລີ້ກ່າວຕື່ມວ່າ, ໃນກ້າວຕໍ່ໄປຈະພະຍາຍາມຊຸກຍູ້ການທ່ອງທ່ຽວປ່າຈາກການທ່ຽວຊົມທຳມະຊາດເປັນຕົ້ນຕໍນັ້ນຫັນມາເນັ້ນຫຼາຍພາກສ່ວນພັດທະນາພ້ອມກັນ, ໃຫ້ການພັດທະນາໃນບາງພາກສ່ວນກາຍມາເປັນການພັດທະນາຢ່າງຮອບດ້ານ.