ຕາມຂ່າວCRI: ຕອນບ່າຍວັນທີ 30 ກັນຍານີ້, ທ່ານຫຼີເຄີ້ສຽງ, ນາຍົກລັດຖະມົນຕີຈີນໄດ້ຕ້ອນຮັບການເຂົ້າຢ້ຽມຄຳນັບຂອງຜູ້ຊ່ຽວຊານຕ່າງປະເທດທີ່ໄດ້ຮັບລາງວັນ "ມິດຕະພາບ" ປີ 2017ທີ່ລັດຖະບານຈີນມອບໃຫ້ພ້ອມດ້ວຍຄອບຄົວຂອງເຂົາຢູ່ຫໍສະພາປະຊາຊົນແຫ່ງຊາດທີ່ນະຄອນຫຼວງປັກກິ່ງ.
ທ່ານຫຼີເຄີ້ສຽງສະແດງຄວາມຊົມເຊີຍຕໍ່ຜູ້ຊ່ຽວຊານຕ່າງປະເທດທີ່ໄດ້ຮັບລາງວັນດັ່ງກ່າວ, ທັງຢືນຢັນຢ່າງເຕັມທີຕໍ່ຄວາມພະຍາຍາມຂອງຜູ້ຊ່ຽວຊານເຫຼົ່ານີ້ໃນການຊຸກຍູ້ການພັດທະນາຂອງຈີນໂດຍສະເພາະເຂດພາກກາງແລະພາກຕາເວັນຕົກ, ແລະຊຸກຍູ້ການໄປມາຫາສູ່ກັນຢ່າງໄມຕີຈິດມິດຕະພາບລະຫວ່າງຈີນກັບຕ່າງປະເທດ.ທ່ານຫຼີເຄີ້ສຽງກ່າວວ່າ, ພວກເຮົາຖືບັນດາທ່ານເປັນສະມາຊິກຂອງມະຫາຄອບຄົວຈີນ, ຈະສືບຕໍ່ສ້າງເງື່ອນໄຂ, ເຮັດໃຫ້ບັນດາທ່ານເຮັດວຽກແລະດຳລົງຊີວິດຢູ່ຈີນຢ່າງສະດວກສະບາຍກວ່າເກົ່າ.
ທ່ານຫຼີເຄີ້ສຽງຊີ້ວ່າ, ຈີນໃນຖານະເປັນປະເທດກຳລັງພັດທະນາທີ່ໃຫຍ່ທີ່ສຸດໃນໂລກ, ພວມຢູ່ໃນໄລຍະສຳຄັນການຫັນປ່ຽນຮູບແບບແລະຍົກລະດັບເສດຖະກິດກໍຄືການຫັນປ່ຽນຈາກພະລັງງານເດີນເຄື່ອນແບບເກົ່າເປັນແບບໃໝ່, ຂະນະທີ່ກຳລັງບົ່ມຊ້ອນແລະທ່າແຮງໃຫຍ່ທີ່ສຸດກໍແມ່ນຊັບພະຍາກອນມະນຸດແລະຜູ້ມີຄວາມຮູ້ຄວາມສາມາດ.ແນວໃດກໍດີ, ພວກເຮົາຕ້ອງວາງມາດຕະການຕ່າງໆເພື່ອສ້າງຄວາມສະດວກໃຫ້ແກ່ຜູ້ມີຄວາມຮູ້ຄວາມສາມາດຊາວຕ່າງປະເທດດ້ານການເຮັດວຽກ, ຂໍວິຊາແລະອາໄສຢູ່ຈີນ；ເຮັດວຽກການຮັກສາຊັບສິນທາງປັນຍາໃຫ້ດີກວ່າເກົ່າ, ເຮັດໃຫ້ຜົນສຳເລັດຈາກສະຕິປັນຍາມີມູນຄ່າຂອງມັນເອງເທົ່າທີ່ຄວນ. ຍິນດີຕ້ອນຮັບຜູ້ຊ່ຽວຊານແລະຜູ້ມີຄວາມຮູ້ຄວາມສາມາດຊາວຕ່າງປະເທດເສີມຂະຫຍາຍບົດບາດຂອງຕົນໃນການສ້າງສາການຫັນເປັນທັນສະໄໝຂອງຈີນ, ສືບຕໍ່ຊຸກຍູ້ການຍົກລະດັບເຕັກໂນໂລຊີ, ເປີດກວ້າງການບໍລິໂພກ, ຊຸກຍູ້ການຫັນປ່ຽນຮູບແບບແລະຍົກລະດັບເສດຖະກິດຈີນແລະປະກອບສ່ວນເຂົ້າໃນການຟື້ນຕົວກໍຄືການເຕີບໂຕຂອງເສດຖະກິດຂອງໂລກ.
