ວັນທີ 4 ຕຸລານີ້ຢູ່ນະຄອນຫຼວງກົວລາລຳເປີປະເທດມາເລເຊຍ, ທະນາຄານໂລກໄດ້ເປີດເຜີຍບົດລາຍງານປະຈຳເຄິ່ງປີຂອງເສດຖະກິດພາກພື້ນອາຊີຕາເວັນອອກແລະປາຊີຟິກໂດຍຄາດວ່າ ອັດຕາການເຕີບໂຕຂອງເສດຖະກິດຈີນໃນປີນີ້ຈະເກີນຄາດຄະເນໂດຍບັນລຸເຖິງ 6,7%, ປີ 2018 ຈະຫຼຸດລົງເລັກໜ້ອຍຄືຢູ່ໃນລະດັບ 6,4% ແລະປີ 2019 ຢູ່ໃນລະດັບ 6,3%.
ນີ້ຄືອົງການຈັດຕັ້ງສາກົນສຳຄັນອີກອົງການໜຶ່ງທີ່ໄດ້ປັບຍົກອັດຕາການເຕີບໂຕຂອງເສດຖະກິດຈີນໃນປີນີ້ແລະປີໜ້າຕາມຄາດຄະເນຫຼັງອົງການກອງທຶນເງິນຕາສາກົນໄດ້ປັບຍົກອັດຕາການເຕີບໂຕດ້ານເສດຖະກິດຂອງຈີນ. ເດືອນເມສາຜ່ານມາ, ທະນາຄານໂລກໄດ້ຄາດຄະເນວ່າ ໃນປີ 2017,ເສດຖະກິດຈີນຈະເຕີບໂຕ 6,5% ແລະປີ 2018 ຈະເຕີບໂຕ 6,3%.
ບົດລາຍງານລະບຸວ່າ: ເນື່ອງຈາກເສດຖະກິດຈີນຈະສືບຕໍ່ປ່ຽນຈາກການເຕີບໂຕດ້ວຍການຂັບເຄື່ອນຂອງການລົງທຶນຫັນໄປສູ່ການເຕີບໂຕຈາກການຂັບເຄື່ອນຂອງການບໍລິໂພກພາຍໃນປະເທດຢ່າງຕໍ່ເນື່ອງ, ຈິ່ງຄາດວ່າ ໃນປີ 2018ຫາປີ2019,ອັດຕາການເຕີບໂຕຂອງເສດຖະກິດຈີນອາດຈະຫຼຸດລົງ. ຂະນະດຽວກັນ, ບົດລາຍງານຍັງລະບຸຕື່ມວ່າ, ການປະຕິຮູບແບບຍືນຍົງຂອງລັດວິສາຫະກິດຢູ່ໃນປະເທດຈີນ ຈະສາມາດປັບປຸງການຄາດຄະເນດ້ານການຂະຫຍາຍຕົວຂອງເສດຖະກິດໃຫ້ດີຂຶ້ນ.
 |
