ວັນທີ 4 ຕຸລານີ້, ເຈົ້າໜ້າທີ່ສະຫະພາບເອີຣົບປະກາດຢູ່ນະຄອນຫຼວງຕຣີໂປລີປະເທດລີບີວ່າ: ຈະໃຫ້ທຶນຊ່ວຍເຫຼືອທີ່ມີມູນຄ່າເຖິງ 353 ລ້ານໂດລາສະຫະລັດແກ່ລັດຖະບານປອງດອງຊາດລີບີ ເພື່ອໃຊ້ເຂົ້າໃນການຟື້ນຟູສັນຕິພາບແລະສະຖຽນລະພາບຂອງປະເທດດັ່ງກ່າວ.
ໃນມື້ດຽວກັນ, ທ່ານ ໂຈຮານເນສ໌ ຮາເອັນ ກຳມະການຄະນະກຳມາທິການສະຫະພາບເອີຣົບທີ່ຊີ້ນຳວຽກງານນະໂຍບາຍປະເທດໃກ້ຄຽງທີ່ດີແລະການເຈລະຈາເປີດກວ້າງຂອງເອີຣົບກ່າວໃນການຖະແຫຼງຂ່າວຫຼັງພົບປະກັບທ່ານ ຟາເຢັສ໌ ເອນ ຊາຣາຈີ ນາຍົກລັດຖະມົນຕີລີບີວ່າ: ທຶນຊ່ວຍເຫຼືອງວດດັ່ງກ່າວຈະໃຊ້ເຂົ້າໃນການສ້າງຄວາມເຂັ້ມແຂງໃຫ້ລັດຖະບານແລະພັດທະນາຂະແໜງການຕ່າງໆຂອງລີບີ ລວມທັງຍົກປະສິດທິພາບໃນການບໍລິການລະບົບສາທາລະນະສຸກ ກໍຄືຍົກຄຸນນະພາບສະພາບແວດລ້ອມທາງສັງຄົມໃຫ້ດີຂຶ້ນ,ຮັບມືກັບບັນຫາຊາວອົບພະຍົບທີ່ຜິດກົດໝາຍແລະຊ່ວຍການພັດທະນາວິສາຫະກິດຂະໜາດກາງແລະນ້ອຍກໍຄືການອຳນວຍຄວາມສະດວກໃຫ້ແກ່ນັກສຶກສາລີບີທີ່ຮ້ອງຂໍໄປຄົ້ນຄວ້າຕໍ່ຮຽນຢູ່ປະເທດສະຫະພາບເອີຣົບ.
 |
