ຕາມຂ່າວສານຊິນຮວາ: ວັນທີ 4 ຕຸລານີ້, ທ່ານເອໂດກັນ ປະທານາທິບໍດີຕວກກີ ກັບທ່ານຣູຮານີ ປະທານາທິບໍດີອີຣານໄດ້ເຈລະຈາພົບປະກັນຢູ່ນະຄອນຫຼວງເຕເຮຣານຂອງອີຣານ. ສອງຝ່າຍເປັນເອກະພາບກັນວ່າ, ຈະລົງເລິກການຮ່ວມມືໃນດ້ານເສດຖະກິດການຄ້າລະຫວ່າງຕວກກີກັບອີຣານ, ພ້ອມກັນນັ້ນ, ກໍ່ເດັດດ່ຽວຄັດຄ້ານການລົງປະຊາມະຕິເພື່ອແຍກເປັນເອກະລາດຂອງເຂດປົກຄອງຕົນເອງເຄີດີສະຖານຂອງອີຣັກ.
ສອງຝ່າຍເປັນເອກະພາບກັນເຫັນວ່າ, ເຂດປົກຄອງຕົນເອງເຄີດີສະຖານຂອງອີຣັກຈັດການລົງປະຊາມະຕິເພື່ອແຍກເປັນເອກະລາດ ແມ່ນເລື່ອງທີ່ "ຮັບເອົາບໍ່ໄດ້". ທ່ານຣູຮານີກ່າວວ່າ, "ບໍ່ວ່າຜືນແຜ່ນດິນຂອງປະເທດໃດໃນພາກພື້ນນີ້ຖືກແບ່ງແຍກ, ພວກຂ້າພະເຈົ້າລ້ວນແຕ່ຮັບເອົາບໍ່ໄດ້, ແລະເຫັນວ່າ, ອີຣັກເປັນປະເທດເອກະພາບ ແລະເອກະລາດ", ຜູ້ນຳເຂດເຄີດີສະຖານຕ້ອງ "ແກ້ໄຂຄວາມຜິດຂອງພວກເຂົາ". ທ່ານເອໂດກັນຢືນຢັນວ່າ, "ອີຣານແລະຕວກກີໄດ້ປະກາດແລ້ວວ່າ, ຈະບໍ່ຮັບຮອງຜົນການລົງປະຊາມະຕິເພື່ອແຍກເຄີດີສະຖານອອກຈາກອີຣັກ."