ທະນາຄານປະຊາຊົນຈີນໄດ້ເປີດເຜີຍຕົວເລກຂໍ້ມູນໃນວັນທີ 9 ຕຸລານີ້ ວ່າ: ໃນທ້າຍເດືອນກັນຍາຜ່ານມາ, ຄັງສຳຮອງເງິນຕາຕ່າງປະເທດຂອງຈີນໄດ້ມີເຖິງ 3108 ຕື້ 500 ລ້ານໂດລາສະຫະລັດ, ເພີ່ມຂຶ້ນ 0,5% ເມື່ອທຽບໃສ່ເດືອນສິງຫາທີ່ຜ່ານມາຄືເພີ່ມຂຶ້ນ 17 ຕື້ໂດລາສະຫະລັດ ເຊິ່ງເປັນໄລຍະທີ່ມີການເຕີບໂຕຕິດຕໍ່ກັນຍາວທີ່ສຸດນັບແຕ່ເດືອນມິຖຸນາປີ 2014 ເປັນຕົ້ນມາ. ເຫັນໄດ້ຈາກ 3 ໄຕມາດທຳອິດຂອງປີນີ້, ຫຼັງຄັງສຳຮອງເງິນຕາຕ່າງປະເທດໃນເດືອນມັງກອນປີນີ້ໄດ້ຫຼຸດລົງເຖິງຈຳນວນໜ້ອຍທີ່ສຸດແລ້ວໄດ້ມີທ່າອ່ຽງເພີ່ມຂຶ້ນ, ແລະມາຮອດທ້າຍເດືອນກັນຍາປີນີ້ໄດ້ບັນລຸການເຕີບໂຕ 8 ເດືອນຕິດຕໍ່ກັນ.
ເຈົ້າໜ້າທີ່ທີ່ກ່ຽວຂ້ອງຂອງອົງການຄຸ້ມຄອງເງິນຕາຕ່າງປະເທດຂອງຈີນກ່າວວ່າ: ເລີ່ມແຕ່ປີນີ້ເປັນຕົ້ນມາ, ສະພາບເສດຖະກິດແລະການທະນາຄານຂອງຈີນໄດ້ພັດທະນາໄປໃນທາງທີ່ດີແລະໝັ້ນທ່ຽງ,ເຊິ່ງໄດ້ສະໜອງການຄ້ຳປະກັນໂດຍພື້ນຖານໃຫ້ແກ່ຄັງສຳຮອງເງິນຕາຕ່າງປະເທດເພີ່ມຂຶ້ນຕິດຕໍ່ກັນ.