ເນື່ອງຈາກໄຟໄໝ້ປ່າຢູ່ລັດກາລິໂຟເນຍອາເມລິກາສືບຕໍ່ເພີ່ມຂຶ້ນ. ວັນທີ 11 ຕຸລານີ້, ພະແນກປ່າໄມ້ ແລະດັບເພີງກາລິໂຟເນຍຢືນຢັນວ່າ: ອັກຄີໄພຄັ້ງນີ້ໄດ້ເຮັດໃຫ້ 21 ຄົນເສຍຊີວິດ. ປັດຈຸບັນ, ນັກດັບເພີງ 8000 ຄົນກຳລັງປະຕິບັດໜ້າທີ່ຂອງຕົນຢ່າງໜັກໜ່ວງ. ຕາມສື່ມວນຊົນທ້ອງຖິ່ນລາຍງານວ່າ: ນີ້ແມ່ນໄຟໄໝ້ປ່າທີ່ຮຸນແຮງທີ່ສຸດຄັ້ງໜຶ່ງຂອງກາລິໂຟເນຍໃນໄລຍະຜ່ານມາ ເຊິ່ງໄດ້ລຸກລາມເຖິງ 1 ແສນ 7 ໝື່ນເຮັກຕາ ເຮັດໃຫ້ມີສິ່ງກໍ່ສ້າງ 3000 ແຫ່ງຖືກເຜົາຜານ.
ອົງການອຸຕຸນິຍົມທ້ອງຖິ່ນປະກາດເຕືອນໄພວ່າ: ຈະມີລົມພັດແຮງ ແລະອາກາດຮ້ອນ ເຊິ່ງຈະສ້າງຄວາມຫຍຸ້ງຍາກໃຫ້ເຈົ້າໜ້າທີ່ຫຼາຍໃນການດັບເພີງຄັ້ງນີ້.
ຕອນບ່າຍວັນທີ 8 ຕຸລານີ້ໃນພາກເໜືອລັດກາລິໂຟເນຍໄດ້ເກີດໄຟໄໝ້ປ່າ. ເຈົ້າໜ້າທີ່ກາລິໂຟເນຍກ່າວວ່າ: ຕ້ອງໄດ້ຮ້ອງຂໍຄວາມຊ່ວຍເຫຼືອໃຫ້ເຈົ້າໜ້າທີ່ດັບເພີງຂອງເຂດອື່ນໆເຂົ້າມາຊ່ວຍຈຶ່ງຈະສາມາດດັບໄຟໄດ້.