ວັນທີ 13 ຕຸລານີ້, ກອງປະຊຸມສະມາຊິກຄົບຖ້ວນຂອງອົງການຈັດຕັ້ງສີມືໂລກທີ່ຈັດຂຶ້ນຢູ່ນະຄອນຫຼວງອາບູດາບີແຫ່ງສະຫະລັດອາຣັບເມມີເຣດເປັນເອກະສັນຕົກລົງໃຫ້ ຈັດການແຂ່ງຂັນສີມືໂລກຄັ້ງທີ 46 ປີ 2021 ຢູ່ນະຄອນຊຽງໄຮຈີນ.
ຕອນບ່າຍວັນທີ 13 ຕຸລານີ້, ກ່ອນຢືນຢັນວ່ານະຄອນຊຽງໄຮໄດ້ຮັບສິດຈັດການແຂ່ງຂັນ, ທ່ານສີຈີນຜີງ ປະທານປະເທດຈີນໄດ້ກ່າວປາໄສຜ່ານທາງວິດີໂອ ໂດຍຕາງໜ້າລັດຖະບານ ແລະ ປະຊາຊົນຈີນສະແດງການສະໜັບສະໜູນທີ່ໝັ້ນໜຽວໃຫ້ຊຽງໄຮຈັດການແຂ່ງຂັນສີມືໂລກຄັ້ງທີ 46 . ທ່ານສີຈີນຜີງຊີ້ອອກວ່າ, ການແຂ່ງຂັນສີມືໂລກຈັດຂຶ້ນຢູ່ຈີນຈະມີຜົນດີຊຸກຍູ້ໃຫ້ຈີນ ກັບ ບັນດາປະເທດແລກປ່ຽນແລະຖອດຖອນບົດຮຽນເຊິ່ງກັນແລະກັນໃນຂົງເຂດສີມື, ຊັກນຳໃຫ້ປະຊາຊົນທົ່ວປະເທດຈີນ ໂດຍສະເພາະຊາວໜຸ່ມເກືອບ 200 ລ້ານຄົນເອົາໃຈໃສ່, ຮັກຫອມ ແລະ ເຂົ້າຮ່ວມກິດຈະກຳສີມື, ໃຫ້ປະຊາຊົນຈີນມີໂອກາດປະກອບສ່ວນເຂົ້າໃນວິຊາສະເພາະຂອງໂລກ. ລັດຖະບານຈີນຍ້ອງຍໍຈຸດປະສົງການພັດທະນາຂອງອົງການຈັດຕັ້ງສີມືໂລກໃນລະດັບສູງ, ຍິນດີຕັ້ງໜ້າເຂົ້າຮ່ວມກິດຈະກຳຕ່າງໆທີ່ກ່ຽວຂ້ອງ, ສືບຕໍ່ປະກອບສ່ວນເຂົ້າໃນການຫຼຸດຜ່ອນຄວາມທຸກຍາກ ແລະ ການພັດທະນາແບບຍືນຍົງຂອງໂລກໃຫ້ຫຼາຍກວ່າເກົ່າ.
