ວັນທີ 13 ຕຸລານີ້, ທ່ານ ໂດນັນ ທຣຳ ປະທານາທິບໍດີອາເມລິກາໄດ້ກ່າວປາໄສຢູ່ທຳນຽບຂາວຂອງອາເມລິກາ ໂດຍກ່າວປະນາມວ່າອີຣານບໍ່ໄດ້ປະຕິບັດຕາມເນື້ອໃນສັນຍາວ່າດ້ວຍອາວຸດນິວເຄລຍຂອງອີຣານແລະໄດ້ລະເມີດສັນຍາໃນຫຼາຍດ້ານ, ສະນັ້ນປະຕິເສດບໍ່ໃຫ້ຄຳຢືນຢັນຕໍ່ລັດຖະສະພາປະເທດຕົນກ່ຽວກັບອີຣານໄດ້ປະຕິບັດຕາມຄຳໝັ້ນສັນຍາລະບຸໄວ້ໃນສັນຍານິວເຄລຍອີຣານ.
ທ່ານ ຢຸຄີຢະ ອະມາໂນະ ຜູ້ອຳນວຍການໃຫຍ່ອົງການພະລັງງານປະລະມານູສາກົນຫຼື IAEA ໄດ້ຖະແຫຼງໃນວັນທີ 13 ຕຸລານີ້ວ່າ: ມາຮອດປັດຈຸບັນ, ອີຣານໄດ້ປະຕິບັດຕາມຄຳໝັ້ນສັນຍາຂອງຕົນໃນສັນຍາວ່າດ້ວຍອາວຸດນິວເຄລຍອີຣານແລ້ວ ແລະໄດ້ຮັບການກວດກາຢ່າງເຄັ່ງຄັດຈາກອົງການ IAEA.
ກະຊວງການຕ່າງປະເທດຣັດເຊຍກ່າວໃນຕອນຄ່ຳວັນທີ 13 ຕຸລານີ້ວ່າ: ປະເທດຕົນໄດ້ຍຶດໝັ້ນປະຕິບັດຕາມສັນຍາວ່າດ້ວຍອາຍຸດນິວເຄລຍຂອງອີຣານ, ແລະໄດ້ຮຽກຮ້ອງໃຫ້ຝ່າຍຕ່າງໆຈົ່ງເຄົາລົບແລະປະຕິບັດຕາມສັນຍາດັ່ງກ່າວ,ປະຕິບັດພັນທະໜ້າທີ່ຂອງຕົນ. ສັນຍາດັ່ງກ່າວໄດ້ຮັບການສະໜັບສະໜູນຈາກມະຕິເລກທີ 2231 ຂອງສະພາຄວາມໝັ້ນຄົງສະຫະປະຊາຊາດ, ບໍ່ວ່າໃນກໍລະນີໃດໆ, ບັນຫານິວເຄລຍຂອງອີຣານລ້ວນແຕ່ຈະບໍ່ສາມາດຖອຍກັບຄືນສູ່ລະດັບກ່ອນການເຊັນສັນຍາ, ສະພາຄວາມໝັ້ນຄົງສະຫະປະຊາຊາດກໍຈະບໍ່ສາມາດປຶກສາຫາລືກ່ຽວກັບການຟື້ນຟູມາດຕະການລົງໂທດອີຣານອີກ.
ຕອນຄ່ຳວັນທີ 13 ຕຸລານີ້, ທ່ານ ເອັມມານູນ ມາຄຣອນ ປະທານາທິບໍດີຝະຣັ່ງ, ທ່ານນາງ ແອນເຈຈີລາ ເມີເຄວ ນາຍົກລັດຖະມົນຕີເຢຍລະມັນ, ທ່ານນາງ ເຕີຣີຊາ ເມຣີ ເມ ນາຍົກລັດຖະມົນຕີອັງກິດໄດ້ອອກຖະແຫຼງການຮ່ວມ ໂດຍສະແດງຄວາມເປັນຫ່ວງຕໍ່ການຕົກລົງດັ່ງກ່າວຂອງທ່ານ ໂດນັນ ທຣຳ, ພ້ອມທັງເດັດດ່ຽວສະໜັບສະໜູນສັນຍາດັ່ງກ່າວແລະໃຫ້ບັນດາຝ່າຍຮ່ວມກັນຈັດຕັ້ງປະຕິບັດສັນຍາຢ່າງຮອບດ້ານ ທັງກ່າວວ່າການຮັກສາແຜນການເຄື່ອນໄຫວດັ່ງກ່າວສອດຄ່ອງກັບຜົນປະໂຫຍດຮ່ວມຂອງ 3 ປະເທດຝະຣັ່ງ, ອັງກິດແລະເຢຍລະມັນ.