ທ່ານນາງ ອອງຊານຊູຈີ ທີ່ປຶກສາແຫ່ງລັດມຽນມາ ກ່າວຢູ່ນະຄອນຫຼວງເນປີດໍໃນວັນທີ 15 ຕຸລານີ້ວ່າ, ຍິນດີຕ້ອນຮັບກຸ່ມປະກອບອາວຸດຂອງຊົນເຜົ່າຢູ່ທ້ອງຖິ່ນທີ່ຍັງບໍ່ທັນໄດ້ເຊັນສັນຍາຢຸດຍິງນັ້ນ ເຂົ້າຮ່ວມຂະບວນການສັນຕິພາບ.
ທ່ານນາງ ອອງຊານຊູຈີ ໄດ້ກ່າວປາໄສໃນພິທີສະຫຼອງວັນເຊັນສັນຍາຢຸດຍິງທົ່ວປະເທດຄົບຮອບ 2 ປີວ່າ, ສັນຍາຢຸດຍິງທົ່ວປະເທດ ເປັນການເປີດປະຕູຕໍ່ການເຈລະຈາການເມືອງ ແລະ ການເຈລະຈາການເມືອງ ຈະເປັນການປູທາງໃຫ້ແກ່ກອງປະຊຸມປັງລອງສະຕະວັດທີ 21 ແລະ ກອງປະຊຸມສັນຕິພາບສະຫະພາບຄັ້ງໃໝ່ທີ່ຈະໄຂຂຶ້ນໃນທ້າຍປີນີ້. ພ້ອມທັງຫວັງວ່າກອງປະຊຸມນີ້ ຈະໄດ້ຮັບໝາກຜົນຫຼາຍກວ່າເກົ່າ ແລະ ໂອກາດແຫ່ງການສິ້ນສຸດການປະທະກັນຜ່ານຊ່ອງທາງການເມືອງນັ້ນ ກໍຈະມາຮອດໃນໄວໆນີ້ແລ້ວ.
ພາຍຫຼັງລັດຖະບານໃໝ່ຂອງມຽນມາທີ່ນຳໂດຍພັກສັນນິບາດປະຊາທິປະໄຕແຫ່ງຊາດ ຫຼື NLD ຂຶ້ນກຳອຳນາດໃນປີ 2016 ແລ້ວ, ໄດ້ໄຂກອງປະຊຸມປັງລອງສະຕະວັດທີ 21 ແລະ ກອງປະຊຸມສັນຕິພາບຄັ້ງທຳອິດໃນເດືອນສິງຫາປີ 2016 ໂດຍໄດ້ຕົກລົງວ່າ ຈະໄຂກອງປະຊຸມນີ້ໃນຮອບ 6 ເດືອນ ຈົນກວ່າມຽນມາຈະບັນລຸສັນຕິພາບຖາວອນ.