ສູນຂ່າວກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ໄດ້ຈັດງານລ້ຽງຢູ່ໂຮງແຮມມີເດຍປັກກິ່ງໃນຕອນຄ່ຳວັນທີ 16 ຕຸລານີ້ໂດຍມີນັກຂ່າວຈີນແລະຕ່າງປະເທດ 500 ກວ່າຄົນເຂົ້າຮ່ວມ.
ໂອກາດດັ່ງກ່າວ, ທ່ານຫວງຄຸນໝິງ ຫົວໜ້າໜ່ວຍຂ່າວກອງເລຂາຂອງກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນຕໍ່ນັກຂ່າວຈີນແລະຕ່າງປະເທດໂດຍກ່າວວ່າ ກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນທີ່ຈະໄຂຂຶ້ນໃນໄວໆນີ້ໄດ້ເປີດກວ້າງກວ່າເກົ່າເພື່ອຕ້ອນຮັບສື່ມວນຊົນຈີນແລະຕ່າງປະເທດມາເກັບກຳຂ່າວ ທັງອຳນວຍຄວາມສະດວກຮອບດ້ານໃຫ້ແກ່ນັກຂ່າວຈີນແລະຕ່າງປະເທດບໍ່ວ່າໃນການເກັບກຳຂ່າວກໍຄືການດຳລົງຊີວິດແລະຮັບປະກັນໃຫ້ບັນດານັກຂ່າວປະສົບຜົນສຳເລັດຢ່າງຈົບງາມໃນການລາຍງານຂ່າວກ່ຽວກັບກອງປະຊຸມພ້ອມທັງຫວັງວ່າ ບັນດານັກຂ່າວຈີນແລະຕ່າງປະເທດຈະລາຍງານສະພາບຍິ່ງໃຫຍ່ຂອງກອງປະຊຸມໃຫຍ່ຄັ້ງທີ 19 ຕໍ່ທົ່ວໂລກຢ່າງທັນການເພື່ອນຳສະເໜີແນວຄິດການປົກຄອງແລະຍຸດທະສາດບໍລິຫານປະເທດຂອງພັກກອມມູນິດຈີນຢ່າງຮອບດ້ານແລະຖືກຕ້ອງ ທັງສ່ອງແສງໃຫ້ເຫັນການປ່ຽນແປງຄັ້ງປະຫວັດສາດພ້ອມດ້ວຍຜົນສຳເລັດທີ່ມີຄວາມໝາຍສຳຄັນໃນປະຫວັດສາດຂອງຈີນຢ່າງພາວະວິໄສແລະຍຸຕິທຳ.
ສູນຂ່າວກອງປະຊຸມເປີດເຜີຍວ່າ: ກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນໄດ້ຮັບຄວາມສົນໃຈຢ່າງກວ້າງຂວາງຈາກສື່ມວນຊົນທັງພາຍໃນແລະຕ່າງປະເທດໂດຍມີ ນັກຂ່າວ 3068 ຄົນມາເກັບກຳຂ່າວ, ໃນນີ້, ນັກຂ່າວຮົງກົງ,ມາກາວແລະໄຕ້ຫວັນຈີນ ພ້ອມດ້ວຍນັກຂ່າວຕ່າງປະເທດມີເຖິງ 1818 ຄົນ ແລະນັກຂ່າວຕ່າງປະເທດມາຈາກ 134 ປະເທດໃນ 5 ທະວີບຂອງໂລກ.
