ວັນທີ 16 ຕຸລານີ້, ກະຊວງການເງິນຈີນໄດ້ເປີດເຜີຍຂໍ້ມູນໂດຍສະແດງໃຫ້ເຫັນວ່າ: ໃນ 3 ໄຕມາດທຳອິດຂອງປີນີ້, ລາຍຮັບຂອງທົ່ວປະເທດໄດ້ເພີ່ມຂຶ້ນ 9,7% ແລະລາຍຈ່າຍເພີ່ມຂຶ້ນ 11,4% ໂດຍລວມແລ້ວສະພາບການດ້ານການເງິນເຫັນໄປໃນແງ່ທີ່ດີສົມຄວນ, ເສດຖະກິດພັດທະນາແລະກ້າວໄປໜ້າໃນທາງທີ່ດີຢ່າງໝັ້ນທ່ຽງ ເຊິ່ງເປັນການຄ້ຳປະກັນທີ່ເຂັ້ມແຂງຕໍ່ການເພີ່ມລາຍຮັບຂອງປະເທດ.
ທ່ານ ໂຫຼວຫົງ ຫົວໜ້າກົມຄັງເງິນຂອງກະຊວງການເງິນຈີນໄດ້ໃຫ້ຮູ້ ວ່າ: ໃນ 3 ໄຕມາດທຳອິດຂອງປີນີ້ ຕົວເລກລາຍຮັບແລະລາຍຈ່າຍຂອງການເງິນທົ່ວປະເທດຍັງໄດ້ສະແດງໃຫ້ເຫັນທ່າອ່ຽງແຫ່ງການພັດທະນາເສດຖະກິດຂອງຈີນທີ່ດີ ໂດຍໂຄງປະກອບເສດຖະກິດໄດ້ຮັບການປັບປຸງດີຂຶ້ນກວ່າເກົ່າ, ການພັດທະນາມີຄວາມສົມດຸນຍິ່ງຂຶ້ນ,ການຄ້ຳປະກັນສະພາບຊີວິດການເປັນຢູ່ຂອງປະຊາຊົນມີຄວາມໝັ້ນແກ່ນກວ່າເກົ່າ.
ທ່ານ ໂຫຼວຫົງ ຊີ້ໃຫ້ເຫັນວ່າ: ເບິ່ງໂດຍລວມແລ້ວ, ໃນ 3 ໄຕມາດທຳອິດຂອງປີນີ້, ລາຍຮັບການເງິນຂອງທົ່ວປະເທດໄດ້ເຕີບໂຕອ່າວວ່ອງໄວແລະມີຄຸນນະພາບ ພ້ອມທັງມີໂຄງປະກອບດີຂຶ້ນກວ່າເກົ່າ ແລະຈະສາມາດບັນລຸເປົ້າໝາຍຂອງງົບປະມານປີນີ້ໄດ້. ສິ່ງທີ່ໜ້າສົນໃຈອີກຢ່າງໜຶ່ງແມ່ນ, ລາຍຈ່າຍດ້ານການປ້ອງກັນມົນລະພິດ,ການປະຢັດພະລັງງານແລະການຫຼຸດຜ່ອນຄວາມທຸກຍາກເປັນຕົ້ນຕ່າງກໍໄດ້ເພີ່ມຂຶ້ນປະມານ 50% ເຊິ່ງນີ້ໄດ້ສະແດງໃຫ້ເຫັນວ່າການສະໜັບສະໜູນການພັດທະນາແບບສີຂຽວ,ການໜູນຊ່ວຍການຫຼຸດພົ້ນອອກຈາກຄວາມທຸກຍາກໂດຍຜ່ານການເງິນໄດ້ມີຄວາມໝັ້ນແກ່ນກວ່າເກົ່າ.
 |
