ຂະບວນລົດມິດຕະພາບ "ວັດທະນະທຳແມ່ນ້ຳລ້ານຊ້າງ-ແມ່ນ້ຳຂອງ" ໄດ້ເດີນທາງເຖິງນະຄອນຫຼວງບາງກອກປະເທດໄທໃນຕອນຄ່ຳວັນທີ 16 ຕຸລານີ້. ມື້ດຽວກັນ, ສູນວັດທະນະທຳຈີນຢູ່ບາງກອກ ໄດ້ຈັດພິທີຕ້ອນຮັບ ໂດຍມີທ່ານ ທະນາສັກ ປະທິມາປຣະກອນ ຮອງນາຍົກລັດຖະມົນຕີໄທ ແລະ ທ່ານ ຫຼູຈ້ຽນ ເອກອັກຄະລັດຖະທູດຈີນປະຈຳໄທ ໄດ້ໄປຕ້ອນຮັບສະມາຊິກຂະບວນລົດ.
ຂະບວນລົດນີ້ມີລົດ 13 ຄັນ ແລະມີສະມາຊິກ 40 ຄົນ, ລວມທັງນັກຂ່າວຂອງຈີນແລະໄທຈຳນວນໜຶ່ງ ໂດຍພວກເຂົາເຈົ້າໄດ້ອອກເດີນທາງຈາກເມືອງນິງໂປ່ແຂວງເຈີ້ຈ່ຽງ ສປ ຈີນເມື່ອວັນທີ 24 ກັນຍາຜ່ານມາ, ແລ່ນຜ່ານ 5 ເຂດແຂວງຂອງຈີນຄື: ແຂວງເຈີ້ຈ່ຽງ, ຟູຈ້ຽນ, ກວາງຕຸ້ງ, ເຂດກວາງຊີ ແລະ ແຂວງຢູນນານ ແລະຜ່ານຫຼາຍແຂວງຂອງໄທ, ຫຼັງຈາກນັ້ນ ຈະເດີນທາງສູ່ລາວ ແລະກຳປູເຈຍ ເພື່ອດຳເນີນກິດຈະກຳໂຄສະນາເຜີຍແຜ່ວັດທະນະທຳທ່ອງທ່ຽວ ເຊິ່ງມີໄລຍະທາງທັງໝົດ 1 ໝື່ນກວ່າກິໂລແມັດ.
ທ່ານ ທະນາສັກ ຮອງນາຍົກລັດຖະມົນຕີໄທ ໄດ້ສະແດງຄວາມຍິນດີຕ້ອນຮັບ ແລະ ຂອບໃຈ ຕໍ່ສະມາຊິກທັງໝົດ ແລະເຫັນວ່າ, ກິດຈະກຳຄັ້ງນີ້ໄດ້ໂຄສະນາເຜີຍແຜ່ຫຼາຍເມືອງຂອງໄທສູ່ນັກທ່ອງທ່ຽວຈີນ ເຊິ່ງມີຜົນດີຕໍ່ນັກທ່ອງທ່ຽວຈີນໃນການຊອກຮູ້ຮີດຄອງປະເພນີທີ່ແຕກຕ່າງກັນຂອງປະເທດຕົນ ແລະເພີ່ມທະວີການແລກປ່ຽນວັດທະນະທຳລະຫວ່າງໄທກັບຈີນ ກໍຄືບັນດາປະເທດລຸ່ມແມ່ນ້ຳຂອງ.