ໄທຈະສົ່ງທະຫານຊ່າງແສງໄປປະຕິບັດໜ້າທີ່ຮັກສາສັນຕິພາບຢູ່ຊູດັງໃຕ້

ຄະນະລັດຖະບານໄທຕົກລົງໃນວັນທີ 17 ຕຸລານີ້ໂດຍຈະແຕ່ງຕັ້ງກອງຮ້ອຍທະຫານຊ່າງແສງ 268 ຄົນເດີນທາງໄປປະຕິບັດໜ້າທີ່ຮັກສາສັນຕິພາບຂອງອົງການສະຫະປະຊາຊາດຢູ່ຊູດັງໃຕ້.

ໂຄສົກລັດຖະບານໄທຢືນຢັນວ່າ ຄະນະລັດຖະບານໄດ້ຮັບຮອງໃຫ້ແຕ່ງຕັ້ງກອງຮ້ອຍທະຫານຊ່າງແສງກອງໜຶ່ງເດີນທາງໄປສາທາລະນະລັດຊູດັງໃຕ້ເພື່ອເຂົ້າຮ່ວມການເຄື່ອນໄຫວຮັກສາສັນຕິພາບຂອງອົງການສະຫະປະຊາຊາດຢູ່ປະເທດດັ່ງກ່າວ, ນີ້ຄືຄຳໝັ້ນສັນຍາທີ່ທ່ານນາຍົກລັດຖະມົນຕີປຣະຢຸດຈັນໂອຊາໃຫ້ໄວ້ກັບອົງການສະຫະປະຊາຊາດກ່ອນໜ້ານີ້. ຂະນະທີ່ກອງຊ່າງແສງດັ່ງກ່າວປະຕິບັດໜ້າທີ່ຢູ່ນະຄອນຫຼວງຈູບາປະເທດດັ່ງກ່າວເຊິ່ງມີຄວາມປອດໄພຫຼາຍກວ່າ.

ກ່ອນໜ້ານີ້, ຜູ້ຕາງໜ້າອົງການສະຫະປະຊາຊາດໄດ້ໄປສຳຫຼວດສະພາບການກະກຽມຂອງໄທທັງໃຫ້ລັດຖະບານໄທພິຈາລະນາໃນການໄປປະຕິບັດໜ້າທີ່ຮັກສາສັນຕິພາບຢ່າງໜ້ອຍເປັນເວລາ 1 ປີ.

ຂ່າວແຈ້ງວ່າ: ໄທໄດ້ສົ່ງທະຫານຊ່າງແສງ 268 ຄົນໄປປະຕິບັດໜ້າທີ່ຮັກສາສັນຕິພາບໂດຍອົງການສະຫະປະຊາຊາດຮັບຜິດຊອບຄ່າໃຊ້ຈ່າຍທັງໝົດ ແຕ່ລັດຖະບານໄທຕ້ອງໄດ້ຈ່າຍລ່ວງໜ້າກ່ອນ, ຫຼັງຈາກນັ້ນ,ອົງການສປຊຈະຈ່າຍທົດແທນຄືນໃຫ້ທັງໝົດ.ຂະນະດຽວກັນ, ກອງທັບໄທໄດ້ອະນຸມັດງົບປະມານ 450 ລ້ານບາດແລ້ວເພື່ອໃຊ້ໃນວຽກງານກະກຽມຕ່າງໆເປັນຕົ້ນອາວຸດຍຸດໂທປະກອນອັນຈຳເປັນແລະອື່ນໆ.