ວັນທີ 19 ຕຸລານີ້, ກະຊວງນ້ຳມັນເຊື້ອໄຟອີຣັກກ່າວວ່າ: ລັດຖະບານແລະບໍລິສັດນ້ຳມັນເຊື້ອໄຟຕ່າງປະເທດບໍ່ຄວນຄ້າຂາຍນ້ຳມັນເຊື້ອໄຟກັບເຂດເຄີດິສະຖານໂດຍບໍ່ໄດ້ຮັບການອະນຸມັດຈາກລັດຖະບານອີຣັກຢ່າງເດັດຂາດ.
ທ່ານ ຈັບບາ ລູໄອບີ ລັດຖະມົນຕີກະຊວງນ້ຳມັນເຊື້ອໄຟອີຣັກລະບຸໃນຖະແຫຼງການສະບັບໜຶ່ງວ່າ: ອີງຕາມລັດຖະທຳມະນູນແລະກົດໝາຍ,ມີແຕ່ລັດຖະບານ ແລະກະຊວງນ້ຳມັນເຊື້ອໄຟອີຣັກເທົ່ານັ້ນຈຶ່ງມີສິດເຊັນສັນຍາວ່າດ້ວຍການພັດທະນາແລະລົງທຶນຊັບພະຍາກອນອາຍແກັສທຳມະຊາດແລະນ້ຳມັນເຊື້ອໄຟຢູ່ໃນດິນແດນອີຣັກກັບພາຍນອກໄດ້. ສ່ວນສັນຍາທີ່ເຊັນກັນໂດຍບໍ່ໄດ້ຮັບອະນຸຍາດຈາກລັດຖະບານລ້ວນແຕ່ຜິດກົດໝາຍ.
ເນື່ອງຈາກການສົ່ງອອກນ້ຳມັນເຊື້ອໄຟແມ່ນລາຍຮັບທີ່ສຳຄັນຂອງເຂດເຄີດິສະຖານ, ວັນທີ 16 ຕຸລານີ້, ກອງທັບລັດຖະບານອີຣັກໄດ້ເຂົ້າຄວບຄຸມແຂວງເກີກຸກທີ່ມີຊັບພະຍາກອນອາຍແກັສທຳມະຊາດແລະນ້ຳມັນເຊື້ອໄຟທີ່ອຸດົມສົມບູນຢ່າງເປັນທາງການ, ໂດຍການຄຸ້ມຄອງບໍ່ນ້ຳມັນ,ສິ່ງກໍ່ສ້າງຂຸດຄົ້ນນ້ຳມັນເຊື້ອໄຟແລະທໍ່ສົ່ງນ້ຳມັນເຊື້ອໄຟຂອງແຂວງດັ່ງກ່າວ. ສ່ວນກອງກຳລັງປະກອບອາວຸດເຂດເຄີດິສະຖານທີ່ຄວບຄຸມແຂວງດັ່ງກ່າວນັ້ນໄດ້ຖອນອອກຈາກເຂດດັ່ງກ່າວແລ້ວ.