ງານວາງສະແດງສິນຄ້າເນປານ ຂອງງານວາງສະແດງສິນຄ້າຈີນ-ອາຊີໃຕ້ 2017 ຈະຈັດຂຶ້ນຢູ່ນະຄອນຫຼວງກັດມັນດູ ປະເທດດັ່ງກ່າວແຕ່ວັນທີ 2-5 ພະຈິກໜ້ານີ້ ເຊິ່ງເປັນການສັນຈອນຈັດງານວາງສະແດງສິນຄ້າຈີນ-ອາຊີໃຕ້ຢູ່ຕ່າງປະເທດເປັນຄັ້ງທຳອິດ ແລະກໍແມ່ນຄັ້ງທຳອິດທີ່ແຂວງຢຸນນານ ສປ ຈີນເປັນເຈົ້າພາບຈັດງານວາງສະແດງສິນຄ້າຢູ່ຕ່າງປະເທດເຊັ່ນດຽວກັນ.
ໃນພິທີຖະແຫຼງຂ່າວງານວາງສະແດງສິນຄ້າເນປານ ແຈ້ງໃຫ້ຮູ້ວ່າ: ງານວາງສະແດງດັ່ງກ່າວແມ່ນຈັດໂດຍສຳນັກງານກິດຈະການວາງສະແດງສາກົນຢຸນນານ ແລະ ສະມາຄົມເສດຖະກິດການຄ້າຈີນ-ເນປານ ໂດຍໄດ້ຮັບການມອບໝາຍຈາກສຳນັກງານເລຂາງານວາງສະແດງສິນຄ້າຈີນ-ອາຊີໃຕ້.
ຂ່າວລາຍງານວ່າ: ງານວາງສະແດງດັ່ງກ່າວຈະກວມເນື້ອທີ່ 3.300 ຕາແມັດ ແລະ ມີຮ້ານວາງສະແດງ 150 ຮ້ານ. ນັກທຸລະກິດຈີນ 100 ກວ່າຄົນຈາກຂົງເຂດຕ່າງໆ ເປັນຕົ້ນ ການລົງທຶນພະລັງງານ, ການພັດທະນາບໍ່ແຮ່, ຂະແໜງການທ່ອງທ່ຽວ ແລະ ຂະແໜງຫັດຖະກຳ ຈະເຂົ້າຮ່ວມ, ຂະນະທີ່ນັກທຸລະກິດເນປານ ແລະ ປະເທດອື່ນໆຢູ່ອາຊີໃຕ້ ກໍຈະນຳເອົາຜະລິດຕະພັນປະເພດຕ່າງໆ ເຊັ່ນ ເພັດນິນຈິນດາ, ເຄື່ອງໜັງ, ຊາ, ກາເຟ ແລະອື່ນໆມາວາງສະແດງ.
ນອກນີ້, ວິສາຫະກິດປະເທດຕ່າງໆ ເປັນຕົ້ນ ອິນເດຍ, ສີລັງກາ, ປາກິສຖານ, ບັງກລາເດັດ ແລະ ມຽນມາ ກໍຈະເຂົ້າຮ່ວມງານວາງສະແດງດັ່ງກ່າວເຊັ່ນດຽວກັນ.